COVID-19 kai enkawllai 729 zet awm tawh

Tunhnaiah Mizoram-ah COVID-19 hri kai hmuhchhuah an la pung zel a, nimin tlai thleng khan hri kai enkawllai pawh mi 729 zet an tling leh tawh a ni.

Niminpiah khan Mizoram-ah Sample 547 enfiah leh niin heng atang hian COVID-19 hri kai mi 120 zet hmuh leh an ni a, Sample enfiah atanga chhutin za zela 21.94 te chuan hri hi an kai a ni. Niminpiah a COVID-19 hri kai hmuhchhuah te hi Rapid Antigen Test hmanga Sample enfiah 520 atanga hmuh te vek an ni a, an zinga mi 100 te hi Aizawl District-a hri kai hmuhchhuah te niin Champhai leh Saitual District-ah hri kai mi 10 ve ve hmuh an ni bawk a, District thenkhat a COVID-19 Report siamtu zingah NHM hnuaia thawk, a huho-a chawlh la zinga tel an awm avangin Report hi lut kim se hei ai hian hri kai hmuh pawh hi tam tura ngaih a ni. Niminpiah a RT-PCR Laboratory a Sample enfiah 26 leh TrueNat Laboratory-a Sample enfiah pakhat atangin hri kai hmuhchhuah an awm lo thung a ni.

Nimin khan Lunglei leh Saitual District atangin COVID-19 hrikai mi 12 te enkawl dam an ni ve leh a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,29,982 niin an zinga 2,28,547 te chu enkawl dam an ni tawh a, hri kai hmuhchhuah te atanga chhutin za zela 99.38 te chu enkawl dam ni tawhin hri kai enkawllai 729 zet an awm leh tawh a, hri kai zingah mi 706 an boral tawh a ni.