NABARD kum 41 tlin lawmna Larsap in hmanpui

National Bank for Agriculture and Rural Development (NABARD), Mizoram Regional Office chuan nimin khan NABARD dincham vawi 41-na lawmna hun hmangin Governor Hari Babu Kambhampati chuan a hmanpui a ni.

Mizoram Rural Bank Auditorium, Aizawl-a he hun hmanna ah hian Governor Hari Babu Kambhampati chuan NABARD in kum 40 hmel a hmu thei leh hemi chhunga India ram hmun hrang hranga thingtlang mite tihhmasawn hna hlawhtling taka a thawk chu a lawmpui tak zet tih a sawi a. NABARD in Mizoram Sawrkar hmalakna atan nasa takin sum tam thak hmangin hna a thawk mek zel tih sawiin, tunah hian cheng vbc. 1900 lai Mizoram chhunga thingtlang tihhmasawn hna, loneitute tanpuina atan leh Mizoram a mipui dawr nasat deuh bank thenkhatte tanpuina atan sum a thehchhuak tawh a ni, a ti.

Governor chuan Rural Infrastructure Development Fund (RIDF) - thingtlanga hmasawnna ruhrel siamna tura tanpuina sum kaltlangin Mizoram tan NABARD in sum tam tham tak a thehchhuak chu thil lawmawm tak a ni tih sawiin, hetih rual hian heng sum hmanga hmalakna te hi duh anga chakin kalpui a la ni lova; tan lak nasat a ngai hle a, NABARD atanga tanpuina sum kan hmuh te hi sumhnar dang kan hmuh te aia hlut zawk zia kan hriat a ngai a ni, a ti.

NABARD in Bank pawimawh tak pahnih Mizoram Rural Bank (MRB) leh Mizoram Cooperative Apex Bank (MCAB) ten zau zawka mipui rawng an bawl theih na tura sum a puktir pawh thil lawmawm tak a nih thu pawh Governor chuan sawiin, hei hian heng Bank te tan hian kuthnathawktute an tanpuina kawngah awlsamna a siam ngeiin a rinawm tih a sawi a. NABARD chu Bank leh mipuite indawrna kawngah awlsamna siamtu ni chhunzawm zel tura chahin, Mizoram hmasawnna atana theih tawp chhuah chhunzawm tur leh hmasawn zel tum turin NABARD hnathawkte chu a chah bawk a ni.

He hun hi Health Minister Dr. R. Lalthangliana pawhin khual zahawm nia hmanpuiin NABARD chu kum 40 chhunga India rama thing-tlang mite tihhmasawnna leh loneitute chawikanna kawngah bultantu pawimawh tak a ni tih a sawi a. Heng hmalakna ah te hian hlawhtlinna ropuitak tak a nei tih a sawi a. An hlawhtlinnaah a lawmpui thu a sawi bawk a ni.

He hunah hian Governor chuan Mizoram NABARD hmalakna inziahna lehkhabu ‘Snapshot of NABARD's initiatives in Mizoram’ chu a tlangzarh a. MCAB hnenah Micro ATM hlanin, Mobile Van chahbi Primary Agricultural Credit Societies (PACS) hnenah hlan lehin MRB hnuaia hmalatu JLGs hnenah Cheque a hlan leh bawk a ni.