Bairabi to Mamit chu New NH. No. 6-ah rinluh a ni

Bairabi leh Mamit inkar kawngpui chu ‘New National Highway No. 6’ a rinluh tel a nih thu hriattirna tihchhuah a ni ta.

Tunkar Thawhlehni-a Mizoram Rajya Sabha MP K. Vanlalvena leh Road & Infrastructure Development Board Vice Chairman Er. H. Lalzirliana MLA ten Union Minister of Road Transport and Highways Nitin Jairam Gadkari an hmuh tuma Union Minister in a lo tiam tawh angin Bairabi leh Mamit inkar kawngpui chu ‘New National Highway No. 6’ a rinluh tel a nih thu hriattirna (notification) tihchhuah thar a ni a, he notification hi Ministry of Road Transport and Highway Director Rajesh Gupta hminga tihchhuah a ni.

National Highway No. 6 hi Assam State a Jorabat atanga intanin Shillong paltlangin Dhaleshwar-ah, Bairabi-Kolasib-Aizawl-Seling-Champhai-Zokhawthar-ah a tawp a. He New National Highway No. 6 hi Bairabi atanga pengin Mamit khaw daiah National Highway No. 108 a rawn pawh tawh dawn a ni.

He New National Highway No. 6 puan belh hi a taka laih zawh a nih hunah chuan Mamit District mipuite tan a tangkai hle dawn tih sawrkar thuchhuah chuan tarlangin, Bairabi Rail Head atanga bungraw lo lut te chuan Mamit a thleng zung zung thei tawh ang a.Thil thawnchhuah turte pawhin awlsam leh rang zawkin Bairabi Rail Head a thleng zung zung thei tawh dawn bawk a ni.