Aspirational District hnuaia hmalakna thlirho

Central Prabhari Officer for Aspirational District (Mamit) leh sawrkar laipui-a Joint Secretary ni mek Umakant IFoS chuan nimin khan Mamit District tlawhin Aspirational District hnuaia hmalakna hrang hrang thlirhona hun hman a ni.

Mamit DC Conference Hall-a he thutkhawm ah hian Aspirational District, Mamit hnuaia hmalakna hrang hrangte a lem nena tarlan niin Ranking hnuhnung ber May, 2022-a a lan danin Health & Nutrition-ah 112th niin Education-ah 8th leh Agriculture & Water Resources-ah 72nd a ni. Financial Inclusion & Skill Development-ah 62nd niin Basic Infrastructure-ah 6th a ni mek a. Delta Ranking-a an dinhmun atangin hmasawn ngai lai leh hmachhawpte sawiho zui nghal a ni.

He thutkhawm ah hian Umakant chuan Health and Nutrition parameter tehkhawngah tun dinhmunah hniam taka an awm chu pawm harsa a tih thu sawiin, CPO Mamit District a nih angin pawi a tih thu a sawi a, theihtawp chhuah turin Concern Department-te a hrilh a. Kawng chungchangah pawh Ministry of Road Tranport-ah hmalakpui a tum thu a sawi bawk. Mamit District chu Tourist hmun tha tak a nih thu sawiin, Tourist tlawhtute atangin hmasawnna leh nasa taka Mamit mipuite tan pawh changkanna lamah rah tha a thlen a beisei thu a sawi a. District chawikan nana an hnathawhte chu a chhawr tangkai tur mipuite hnen a thleng tha em tih hriat a nih theih nan mipui atanga feedback system an siam a ngaih thu pawh a sawi bawk a ni.

Umakant hian Sawrkar hotute leh khaw-tlang hruaitute pawh kawmin Fur ruahtui luanral tir mai lova khawlkhawm that a pawimawh thu sawiin, tuihna humhalh turin a tam thei ang ber thingphun uar tur leh tuihna awmsa te humhalh tha-a kumtluana tui kan hman tur a awm theih nana tan la turin a chah bawk a ni.