Sialsuk Doctor chhuina kalpui mek zel a ni

Damlo chunga dik lo taka che-a puh Dr. Linda Lalbiaknungi, Sialsuk Primary Health Centre (PHC)-a Medical Officer chet dan chhui chiang tura ruat, Aibawk BDO in a thil hmuhte sawrkara a thehluh chu um zui tlakah ngaiin, Mizoram sawrkar-a Health Department chuan 'Memorandum of Charge' (chargesheet) a buaipui mek nia thudawn a ni.

Zalen thudawn danin, Health & Family Welfare Department in 'Preliminary Enquiry' ti tura a ruat Aibawk BDO in sawrkar a report a thehluh chu Health Department chuan um zui tlakah a ngai a, tun dinhmunah Memorandum of Charge buaipui mek niin Dr. Linda Lalbiaknungi pawh insawifiahna hun pek a la ni dawn nia hriat a ni. Memorandum of Charge a chhui/puh a nihna a pawm chuan chhui ngai lo a ni ang a, chhui a nihna a pawm loh erawh chuan Enquiry neih chhoh zel tur a ni dawn nia hriat a ni bawk.

Social Media lama tarlan danin, Dr. Linda Lalbiaknungi hian Canteen-ah Rs 1,000 a ti bo a, pawisa rutu ah Sialsuk damdawi In a damlo enkawl lai Lalrengpuia chu puhin damdawi In atangin May 12, 2022-ah a hnawtchhuak a, a tuk May 13, 2022-ah Lalrengpuia hi a boral zui a. Hetianga thu a darh hnu hian he thil thleng chhui tur hian Mizoram sawrkar chuan June ni 1, 2022 khan Aibawk BDO Chinlianmanga chu ruatin June 10, 2022 ralhmain Health & Family Welfare Secretary hnenah report thehlut tura tih a ni a, June ni 2, 2022 atang khan Dr. Linda Lalbiaknungi hi suspend nghal ni bawkin Sialsuk PHC vil rih turin ZMC-a Medical Officer Dr. HJ. Lalnunpuia a ruat a, a hna pangngai bakah chawlhkar khatah vawi thum tal Sialsuk PHC tlawh tura tih a ni a. Sawrkar in hun a pek chhung hian Aibawk BDO hian a thil chhui hi zofelin report a thehlut a, tunah hian bawhzui mek a ni ta a ni.