Zirlai 3000 ten saptawng an zir theihna tur English Language Forum (ELF) Lunglei-ah hawng

Zirlai ten Saptawng a bulthum atanga an zir theihna tur, English Language Forum (ELF) English Programme chu Lunglei-a tan turin Zirtawpni khan Lunglei Bawrhsap Kulothungan A chuan a hawng.

He hunah hian Lunglei DC chuan Lunglei District chhunga zirlai 3000 zetin ELF English Programme kaltlanga zirna an hmang tangkai thei tur chu lawmawm a tih thu sawiin, zirtirtute pawhin he saptawng zirna kawngah hian inthlahdah lova training tul ang angte pawh hlen chhuak zel turin a ngen a. ELF online hmanga saptawng zirna chu a tuipui hle tih sawiin, an hunlaia English zirna an hmuh that tawk loh avanga harsatna an tawh thu a sawi a, programme tha zawk leh changtlung zawk ruahman a ni ta chu naupangte tan malsawmna a nih a beisei thu a sawi a. DEO leh a thawhpuite pawhin he zirna hi an la thutak hle tur a ni tih sawiin, harsatna a awm a nih pawha DC Office-ah thlen thin turin a chah a ni. 

Lunglei DEO Office atangin Joseph Lalngaisanga Chhakchhuak chuan he hmalakna hi Lunglei DC hmalakna atanga bul tan a nih thu a sawi a, Lunglei District chhunga sikul 50 thlanchhuah atanga naupang 3000 ten an zir theih dawn thu leh heng sikul thlanbik atang hian ELF English Programme zirtirtu tur mi 72 thlanchhuahte chu thla 3 chhung training pek an nih dawn thu a sawi a ni.