Silchar-a YMA Day lawmna Tourism Minister in hmanpui

Silchar YMA chuan Inrinni khan YMA Day hmangin he hun hi Tourism Minister Robert Romawia Royte chuan a hmanpui a ni.

He hunah hian Tourism Minister Robert Romawia chuan YMA chu Zofate rohlu, khawvel Zofate suihkhawmtu a ni tih sawiin, tanpui ngaite tanpuiin Mizo hnam tan hma a hruai a, hnung a dawl tlat bawk a ni, a ti a. Silchar Branch YMA chu damlo leh khualzin mi chi hrang hrang lo mikhuala lo dawltu an ni chu an fakawm takzet tih a sawi bakah tang zel turin a fuih a. Silchar Mizote ngenna angin Silchar Mizoram House-a Hall emaw, Tourist Facilitation sak chu Mizoram Sawrkarin a ngai pawimawh tih sawiin, DPR te siamin a sakna sum zawn a ni ang, a ti.

Tourism Minister chuan Mizoram sawrkarin thenawm State te leh ram te nen inkungkaihna tha neih a duh tih pawh sawiin, Silchar leh a chhehvel Zofaten an tih tur leh tih loh tur an hriat thin avangin lawmthu a sawi a. Kohhran hrang hrang Pastor te leh Missionary te YMA nen tha taka an thawkho chu a ropui tih a sawi bawk.

Silchar Branch YMA hian an remchan zawkna avangin YMA Day ni tak thlen hmain YMA Day hi an hmang a, Central YMA hruaitute leh Sports Department hotuten an hmanpui bawk a ni.