Kumdang aiin Vaimim eichhe nasa lo turah ngai

Mizoram-a Fall Army Worm (FAW) Pangang puang chuan kum dang aiin Vaimim a eichhe nasa lo tura ngaih a nih thu Agriculture Director James Lalsiamliana chuan a sawi.

Agriculture Director James Lalsiamliana chuan kum 2019 atanga Fall Army Worm puang tan tawh hi kumin ah hi chuan Vaimim tharchhuah titlem turin a thawk na lo deuh tura an rin thu a sawi a. Tunah hian Mizoram hmun hrang hranga Pangang puangin Vaimim thar tur titlem khawpa a tihchhiat dan enfiah mek a ni a, hnathawk indaihloh avangin duh angin hna a chak thei lo niin a sawi a. Kum dang aia ruahtui a tlak hma avang leh Vaimim chingtute’n Pangang suat dan an thiam sa tawh avangin Vaimim thar a tlem phah vak lo tura a ngaih thu a sawi a ni.

Hriat theih chinah Fall Army Worm Pangang puang hian Mizoram a chhungkaw 3,000 vel a nghawng a, District 9-a khaw 214-ah Pangang hian Vaimim a bei a. Vaimim chinna hectare 580 chuang chu Pangang hian a luhchilh a ni. Saitual District-ah chuan Pangang a puang ve lo ni a thudawn a ni a, Hnahthial District-ah chuan Pangangin Vaimim a bei tho na-in pawi khawih tham a ni lo ni a thudawn a ni bawk.