YMA Day vawi 87-na Mizoram chhung leh pawn hmun hrang hrangah urhsun taka hman a ni

Central YMA President R. Lalngheta chuan Chhung lam leh pawn lam atanga hmelma beitute hneh zel a nih theih nan Pathian hnenah thlen thin tur te, Mizo hnam chu hnam anga a dinchhuah zel theihna tur leh Missionary te kaltlanga din sak YMA chu Mizote inpumkhatna pawl ropui a nih zel theihna tura tan la zel turin Mizo mipuite a sawm a ni. 

COVID-19 hri leng avanga mipui punkhawm khapna hlih a nih hnua YMA Day hmasa ber chu nimin khan hmun hrang hrangah urhsun taka hman a ni a, Central YMA President R. Lalngheta chuan nimin zing khan Aizawl Central YMA Office Tual-ah YMA puanzar pawtparhin hemi hnua Central YMA Conference Hall-a inkhawm tawi neih ah YMA Day 87-na kumin-a Branch hrang hrang ten an lawm danah lawmthu a sawi a. YMA chu pawl ropui, Mizote zawng zawng huap a ni tih sawiin, “Hetihlai hian hruaitute’n tlinlohna tam tak kan nei a. Sawiselna pawh kan dawng thin a, insiamthatna tur pawh tam tak kan nei tih kan inhria a. Kan tlinlohnaah min dawm a, YMA chu pawl ropui tak a nih zel theihnan Mizo mipuite tan la turin ka sawm a ni,” a ti bawk.

He hunah hian tunhnaia Tlawng lui humhalhna nipah fawma Zobawk atanga Bairabi thleng Tlawng lui zawh chhuaktu Romalsawma, Mission Vengthlang chu Central YMA leh AMC ten chawimawina an hlan bawk.

Mizoram-a tlawmngai pawl lian ber ni mek leh tuna 'Young Mizo Association' (YMA) tih ni ta hi June 15, 1935 khan din niin a tirah chuan 'Young Lushai Association' tia din a ni a, October 7, 1947 khan a hming hi YMA tiin thlak leh a ni a. Inchhiarna hnuhnung ber atanga a lan danin YMA hi Central YMA bakah Sub-Hqrs. YMA dingin Group YMA 50 a awm mek a, heng zinga 3 te hi Mizoram pawna ding a ni a, Branch YMA 818 ding tawhin Branch thar pahnih, Central YMA zawmna la tihfel loh a awm bawk a. Kumin hian YMA Member mipa 2,79,246 leh hmeichhia 1,90,463; an vaiin Member 1,90,463 an awm mek a ni.