COVID-19 hri kai enkawllai mi 170 la awm mek

Mizoram-ah COVID-19 hri kai an la tlahniam thei tak tak rih lo niin a lang a, nimin tlai thleng khan Mizoram-ah hri kai enkawllai mi 170 an la awm a ni.

Niminpiah khan Mizoram-ah Sample 423 enfiah niin heng atang hian COVID-19 hri kai mi 45 lai hmuhchhuah leh an ni a, Sample enfiah atanga chhutin za zela 10.64 te chuan hri kaiin hri kai hmuhchhuah zinga 44 te hi Rapid Antigen Test hmanga Sample enfiah 404 atanga hmuh niin Mamit District-ah hri kai mi 17 hmuhchhuah an ni a, Aizawl District-ah 14, Kolasib District-ah 10 leh Saitual District-ah hri kai mi 3 hmuh an ni. Niminpiah khan ZMC-a RT-PCR Laboratory ah Sample 5 enfiah niin hri kai hmuh an awm lova, TrueNat Laboratory-ah Sample 14 enfiah ni bawkin Aizawl-ah hri kai pakhat hmuh a ni.

Nimin khan Mizoram-ah COVID-19 hri kai enkawl dam mi 20 an awm belh ve leh a, heti hian nimin tlai dar 5:00 thleng khan Mizoram a COVID-19 hri kai hmuhchhuah tawh chu 2,28,620 niin an zinga 2,27,749 te chu enkawl dam ni tawhin hri kai zingah za zela 99.62 te chu enkawl dam an ni tawh a, hri kai enkawllai mi 170 la awmin hri kai zingah mi 701 an boral tawh a ni.