Chief Minister in YMA Day a hmanpui

Chief Minister Zoramthanga chuan a bial chhung Zembawk GZHS Tual-a YMA Day vawi 87-na puala hun hman chu hmanpuiin nizan khan Thuampui YMA Hall-ah YMA Day lawmna a hmanpui bawk.

Nimin-a YMA Day puala inkhawm a hmanpuina ah hian Chief Minister chuanYMA chu tanpui ngaite tanpuitu a nihna chu thil ropui tak, ram dang mite lakah pawh chhuanawm leh inthununna nei tha Hnam kan nihna tilang chiangtu pakhat a nih thu a sawi a. YMA hmalakna ropui tak chhunzawm zel thei turin hruaitute leh member-te duhsakna a hlan a ni. Chief Minister chuan kumin YMA Day kan lawm hian khawtlang nun tichhetu, mi a nih tur ang ni thei lova siamtu Zu leh ruihhlo laka fihlim turin intiam thar leh turin kalkhawm te chu a sawm a, a bik takin thalaite chu heng Zu leh ruihhlo thlemna laka fihlim zel turin a fuih a ni. Chief Minister chuan Zemabawk a hmasawnna hna thawh tur hmachhawp thenkhat sawiin, khawtlang hmasawnna atan theihtawp chhuah a nih zel tur thu a sawi bawk.

Chief Minister chuan khawpuia motor kawngpui chep lutuk ti ziaawm tura hmalakna kal mekah motor dahna hmun, Garage siam turten loan an lakin sawrkarin subsidy a pek theih dan tur ruahman thaa a hriat thu pawh sawiin, Motor neituten a dahna tur an nei lo chu buaina anih avangin sawrkar hmalak mekna Car Parking kalpui remchan lohna hmunah te garage tam zawk siam anih theih nan sawskarin hma a lakpui tha a tih thu a sawi a, Garage siam duhten Bank leh Financial Institution atanga loan an lakah a pung (interest) chu sawrkar atangin engemawzat lo tanpuiin subsidy pek nise, hmun tinah garage 2/3, motor neiten man chawia an dah theihna tur Veng tinah, a kilkhawrah pawh kan mamawh vek a ni, a ti bawk.