Union Minister in Vety College 2 tan Hostel hawng

Union Cabinet Minister for Fisheries, Animal Husbandry Parshottam Rupala chuan nimin khan Central Agricultural University (CAU) hnuaia awm College of Veterinary Sciences & Animal Husbandry, Selesih-a PG Boys Hostel II sak thar a hawng a, hemi rual hian CVSc&AH, Jalukie, Peren, Nagaland-a Transit Hostel sak thar pawh Virtually-in a hawng bawk.

Heng Hostel pahnih a hawnna CVSc&AH, Selesih Auditorium-a neihah Parshottam Rupala chuan ranvulh chu sumdawnna tha tak, a tuk atang maia sum thawkchhuah thei a nih dante sawiin, ranvulh chu eizawnna tha a ni, a ti a. Tunlai thiamna hmangin Sawrkar Laipui chuan ranvulh chungchang hi ti changkan chhoh zel a tum dante sawiin, hlawk zawka mipuiin ranvulh an buapui theih nan Scheme hrang hrang an siam te chu tangkai taka hmang turin ran vulhtute a chah a ni. Sikkim in Organic lamah hming a chher ang bawkin Mizoram a kuthnathawktute leh Sawrkar pawhin hemi kawnga tan la se a duh thu sawiin, hemi kawnga Certification hautak leh sum ngai thin, tih awlsam dan Agriculture Ministry in a ruahman mek thu a sawi bawk.