Police inchhawr chungchanga hmalak a nih thu sawi

Inspector General of Police (IGP) John Neihlaia'n dan in a phal (entitle) bak Police kawl leh mimal hna thawk a inchhawr phal a nih loh thu sawiin, chutiang ti an awm lohna tura hma an lak thin thu a sawi.

Police Officer zingah dan anga an kawl theih chin aia tam Police kawl leh, dan bawhchhia a mimal hna hrang hrang thawk-a an naute chhawr thin an awm nia sawi awm thin chungchang-ah ZALEN zawhna chhangin IGP John Neihlaia chuan, chutiang ang dan bawhchhiatna titawp tur chuan a theih ang anga hma an lak thin thu sawiin, Order an chhuah thin bakah, tawngka pawha dan in a phal bak tumah chhawrlo tura an inhriattir thin thu a sawi a. Police Officer chawl (pension) tawh zingah Police kawl an la awm nia sawi lo awm tawh chungchangah pawh hma an lak thu sawi bawkin, tun dinhmun ah chutiang ang chu an awm hriat a nih loh thu a sawi bawk a. Chutihrual chuan mimal thil leh hnathawk a inchhawr chungchang ah tlem a ngaihthiam chin deuh te erawh awm thei a nih thu te, kaichhan insawm ang te chu hriatthiamawm a tih thu te IGP chuan a sawi. Mizoram Police hnuaiah Police District 11, Sub-Division 18, Police Station 38, Special Police Station 3 leh Police Out-Post 16 a awm mek a, Armed Battalion 8 (MAP Bn. 3 leh IR Bn. 5) a awm a, Border Out-Post 23 a awm. Heng bakah hian Unit dang 6 a la awm bawk a, Mizoram Police hnuaia post awm zawng zawng chu 12,206 niin, hemi atang hian post 8,600 bawr vel hnawhkhah niin, post ruak 3,600 vel a awm mek a ni.