Mizoram tlawhtu Union Minister in ASF vaccine rampawn atanga a ngaihven sak tur thu a sawi

Sawrkar laipui-a Animal Husbandry and Dairying changtu Cabinet Minister Parshottam Khondabhai Rupala chuan Inrinni khan Mizoram rawn thlengin sawrkar mi paiwmawh te nen inkawmna an nei a, ASF vaccine rampawn atanga a ngaihven sak tur thu a sawi bawk.

Union Cabinet Minister Parshottam Khondabhai Rupala hi Aizawl-a Taxation Deparment Auditorium-ah AH & Vety Minister Dr. K. Beichhua leh Fisheries Minister K. Lalrinliana ten lo dawngsawngin, Lok Sabha MP C. Lalrosanga leh Rajya Sabha MP K. Vanlalvena ten an tawiawm a. Mizoram in African Swine Fever (ASF) vanga harsatna an tawh te sutkian nan AH & Vety College, Selesih chuan Laboratory tha a neih a ngai tiin, proposal ziak turin a hrilh a. ASF vaccine pawh rampawn atanga a ngaihven sak tur thu a sawi bawk. Hei bakah hian Minister chuan Sawrkar laipui hmalakna hrang hrang dawngtu (beneficiaries) ten Mizoram sawrkar atanga harsatna an dawnglo tih a hriatin lawmthu a sawi a. India sawrkar chu mi rethei te tana thawk niin, mi retheite chawikan nan Scheme hrang hrang a siam thu leh, cheng nuai 5 thleng dawn theihna Scheme pawh India sawrkar chuan a siam thu a sawi a. Mi rethei leh chanhai zawkten damdawi a tlawm zawka an lei theihna Scheme pawh a siam thu sawiin, COVID-19 avanga ram a buai lai pawhin mi harsa zawk ten ration a thlawna an dawn theihna pawh a siam sak thu te, India sawrkar chuan COVID-19 vaccine a thlawnin a pek vek thu te, kan ram mipui te chauh nilo, ramdangah pawh thawnchhuakin, ram dang tan pawh India chu a tangkai em em tih a sawi a. Infrastructure chungchangah India chuan hma a sawn nasa em em tih pawh sawiin, chung zingah chuan Rel Transportation pawh a tel thu a sawi a. Tunhnaiah Russia leh Ukraine indo karah Indian zirlaiten kan ram Flag kengin kawng an zawh hmuhtur a awm thu leh, India flag chu ramdangah pawh zah a kai chu ropui a tih thu a sawi a ni.

He hun hi AH & Vety Department Secretary Lalzarmawii chuan kaihruaiin Aizawl DC hnen atangin Sawrkar Scheme- MGREGA, PMAY, PMUY, PMJDY, PMSvanidhi, PMKKKY leh a dangte kaltlanga hmasawnna rahbi dawng (beneficiaries) ten eizawnna bul an tan dan te, hlawhtlinna an neih chungchang ngaihthlak leh thlirho a ni a. ASF in Mizoram a nuai dan leh ASF avanga vawk vulh tam takin harsatna an tawh te ngaihthlak niin Blue Revolution Scheme, PMMSY leh Scheme dang te atanga Fish farmers ten hlawhtlinna an neih te pawh he hunah hian tarlan a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man