Tuirial Jail hmunhlui humhalh a ni dawn

Mizoram Rajya Sabha MP K. Vanlalvena chuan Ram tana Zalenna sualtu, Mizo Hnam sipaite tanna Tuirial Jail hmun hlui chu humhalh a, cheibawl a ni ang tih a sawi.

Rajya Sabha MP hian Mizoram zalenna sualtu Hnam sipaite tanna Tuirial Jail hmun hlui hi nimin khan a tlawh a, Tuirial Jail-ah hian Mizo Hnam sipai zalenna sualtu mi engemaw zat an tang a, he Jail pindan chhung atang hian lei verh kua-in October ni 16, 1979 zanlai-ah mi 18 an tlanchhuak a ni. Nimin a helai hmun a tlawhna ah hian Rajya Sabha MP, K. Vanlalvena chuan Mizo hnam pasalthate tlanchhuahna hmun hi a hlu a, thangthar, zirlaite leh khualzinte te tlawh theih turin a hmun hi MP Fund atanga cheibawl a ni dawn tih a sawi a. “Lei verhna lai hi danglam deuh tawh mahse, leiverh kua an hnawhna lai te pawh kan hai chhuak leh anga. Zalenna sualtuten tha leh zung nasa tak senga an beihna hi a hlu a, thangthar zawk te thinlungah ram leh hnam hmangaihna thinlung kan tuh zelna tur hmun pawimawh tak a nih ka ring a ni,” tiin helai hmun cheibawl a nih hmaa a hmunhma lo samfaina turin Tuirial Airfield VCP hnenah MP hian pawisa a pe nghal bawk a ni.

He hunah hian he Jail atanga tlanchhuak mi 18 zinga tel Lalhminga (Hmingtea) leh Lalrengliana te pawh telin, an lei verh dan chanchin an sawi a. Thla hnih chhung zet hmanraw mumal hmanglovin ft. 50 vela sei Pathian hnena tawngtai chungin an verh thu an sawi a. He leiverh atanga tlanchhuak mi 18 zingah hian mi 8 an la dam a ni.

Comments

Popular posts from this blog

Bialtu MLA in Laptop pe