Hnahthial-ah thisen dahthatna tur leh nausen piang hlim damlo enkawlna tur hawn a ni

Health Minister Dr. R. Lalthangliana chuan nimin khan District Hospital, Hnahthial-ah thisen dahthatna (Blood Storage Centre) leh nausen piang hlim damlo enkawlna (New Born Stabilization Unit) te a hawng.

Heng thil hawnna puala inkhawm neih ah Health Minister chuan Mizoram puma H&FW Department tih changtlun leh a kaihhnawih ruhrel te ruahmanna kawnga hmalakna kal mekah District Hospital, Hnahthial pawh tih hmasawn zel niin Hnahthial District mipuite mamawh em em thisen dahthatna leh nausen piang hlim damlo enkawlna te chu tangkai taka hman an nih a, hriselna tha zawk leh damna an thlen ngei a beisei thu a sawi a. Hnahthial-ah CMO Office sak mek anih bakah Medical Test hrang hrang tih theihna tur Integrated Laboratory ruahman tum anih thu a sawi a. World Bank kaltlangin Strengthening of Health System in Mizoram Project hnuaiah cheng vbc. 280 sengin Mizoram puma Health Infrastructure tih changtlun hmalakna nikum atanga bultan niin chak taka kalpui mek anih thu a sawi bawk.

Nimin-a hawn tak Thisen dahthatna (Blood Storage Centre) ah hian Blood Refrigerator leh Centrifuge te dah a ni a. Hnahthial District a thisen pek te dahthat tura Lunglei a thawn thin chu he Blood Storage Centre-ah hian dahthat theih a ni tawh dawn a. He Centre hi tih changtlun zela Hnahthial District Blood Bank tur atana hmalak chhoh zel tum a ni. Nausen piang hlim damlo enkawlna (New Born Stabilization Unit) ah hian Radiant Warmer leh Phototherapy Unit te awmin he Centre-a thawk tur nurse tih fel tawh a ni bawk.