STP ten Damdawi In hmun chungchanga ngaihdan inanglo awm ah hma la turin Bawrhsap an ngen

Serchhip Thalai Pawl (STP) hruaitute chuan nimin khan Serchhip District Bawrhsap Nazuk Kumar IAS chu a Office-ah kawmin Serchhip District Hospital sa tura hmalakna kal mekah ngiahdan inanglo awm avanga harsatna awm thei chungchanga hma la turin an ngen a. Damdawi In sak tur chungchang avanga NGO hruaitu thenkhatte Social Media a sawisel vak vak an awm thin pawh tha lo an tih thu an sawi bawk.

STP hruaitute hian nimin-a Bawrhsap an kawmna ah hian an pawl thiltum ber chu Serchhip Town mipuite inpumkhatna leh inlungrualna a ni tih sawiin, hetihlai hian Hospital hmun turah District Bawrhsap in a ngen anga NGOCoordination Committee ten VC hrang hrang leh Joint VC te nen thutkhawm neia Bukpui hmuna District Hospital sak an rawt chu Serchhip Town tan tha dawna an hriat avangin an thlawp tih thuchhuah te siamin an lo tarlang tawh tih an sawi a. Hetihlai hian tunhnaia a hmun ngaia sak duh ten JAC te dina hmalak anih leh tak avang hian he thil hian Serchhip Town mipuite inpumkhatna tichhe thei ni a an hriat avangin inremna a awm theih nan a rang thei anga hmala turin sawrkar an phut thu an sawi a. STP te chuan Hospital hmun tur atan hian anmahni pawl angin duhthlan bik an neih loh thu an sawi bawk.

He hunah hian District Bawrhsap Nazuk Kumar-i chuan District Hospital sak chu hmanhmawh thlak tak anih tawh thu sawiin, inhruipawhna awm mekah a tul anga hma a lo lak tur thu STP hruaitute hi a lo hrilh bawk a ni.

Serchhip Thalai Pawl (STP) chuan mi thenkhat, a hmun ngaia damdawi In sak duhtu ten damdawi In sawn chngchanga Serchhip-a NGO hruaitute Social Media lama na taka an sawisel thin pawh thalo an tih thu an sawi a, NGO Coordination Committee te hian sawrkar in a hmun rawt tura a tih angin Town chhunga VC leh Joint VC te nen Meeting an neiha an thutlukna an kengkawh mai tih an sawi a, hruaitute dem zawnga mi thenkhatin Social Media-a an thehdarh chu thalo an tih thu an sawi a. Serchhip Town mipui te hi inep lo zawnga a tangho leh hmasawnho zawnga kan kal a pawimawh tih thu sawiin, kan Hospital hmun tur atan pawh sawrkar thutlukna ang ang pawm thiam turin mipuite an ngen tih an sawi bawk a ni.