Serchhip District-a Vaccine pek dan rawn enfiah

Serchhip District-a COVID-19 Vaccine pek dan dinhmun hrang hrangte chu nimin khan rawn enfiah a ni.

UNICEF State Team te chuan Supportive Supervision Monitoring neiin nimin khan Serchhip District hi an rawn tlawh a, Chhingchhip PHC, Chhiahtlang Sub-Centre leh Serchhip-a District Vaccine Store te tlawhin a endikna tura tehkhawng siamsa hrang hrang te hmangin mipuite hnena COVID-19 vaccine pek tawh dan te, Vaccine la duhlo te leh an lak duhloh chhan te bakah Vaccine dahthatna, Cold Chain Points te an rawn endik a, heng bakah hian Vaccine pek dan Central lama thehluh te a tih dan tur ruahman anga chipchiar taka tih a ni em tih te an rawn enfiah a. He hunah hian UNICEF atangin Lalramnghaki, Public Health Immunization Consultant leh Janmejaya Meher, RMN-CHA+RI State Consultant te an rawn kal a ni.

Serchhip-a Health Department hotute hnen atanga thu kan dawn danin tunah hian Ser-chhip District pumah COVID-19 Vaccine la duhlo hi mi 2000 vel an la awm a, Vaccine la thei ten an lak vekna tura hmalakna, Har Ghar Dastak Campaign 2.0 chu nimin atang khan kalpui tan leh niin VC te nen Vaccine pekna tur hmun ruahmanin Vaccine pek hna kalpui leh a ni ang, hemi hnua Vaccine la lo te dapchhuah hna pawh thawh leh tur a ni ang.