State Disaster-ah ASF puan a ni dawn - Vety Minister

AH&Vety Minister Dr. K. Beichhua chuan Mizoram-ah Vawk pul hri, African Swine Fever (ASF) a hluar zel avangin State Disaster a puan a ni thuai dawn tih a sawi.

AH&Vety Minister chuan Mizoram chhungah Vawk pul hri, African Swine Fever (ASF) vangin kum 2021 atangin chhungkaw tam takin harsatna an tawh avang leh harsatna tawh belh zel an awm avangin ASF chu State Disaster a puan a ni thuai dawn tih sawiin, State Disaster a puang tur hian Chief Minister-ah an thlen thu leh Chief Minister pawhin alo pawmpui tawh thu a sawi a, Notification nghah mek anih thu leh State Disaster-a puan anih chuan ASF vanga Vawk chan ten zangnadawmna an dawng thei dawn tih a sawi bawk.

AH&Vety Minister chuan Vawk pul hri, African Swine Fever (ASF) vanga kum 2021 chhunga Vawk suat neitute hnena zangnadawmna pek tur zinga a zatve Rs. 5,84,97,000/- Finance-a an dil mek chu a chhuak tep tawh tih a sawi a, Vawk suat nilo, ASF avanga Vawk thi te zangna-dawmna tur chu Planning & Programme Implementation Department-ah sum an dil a, Planning lamin Project-ah an dah tih a sawi a. Hetihlai hian Sawrkar laipui chuan Mizoram Sawrkar hnenah kumin March ni 22 khan ASF vanga Vawk suat neitute zangnadawmna tur atanga a zatve Rs. 5,84,97,000/- a rawn pe tawh thung a ni. Nimin tlai thleng khan Mizoram-a khaw 54-ah ASF hi leng mekin Vawk 3898 a thi tawh a, Vawk 3276 suat a ni leh tawh bawk a ni.