Governor leh UD&PA Deptt. hotute an inkawm

Mizoram Governor Hari Babu Kambhampati leh Urban Development & Poverty Alleviation (UD&PA) Department hotute chu nimin khan Raj Bhavan-ah inkawmin khawpui leh khawl ian deuha hmasawnna ruhrel lian tak tak UD&PA Department in a khawih mek te an sawiho.

He sawihona ah hian Governor chuan UD&PA hnuaiah chak taka hmasawnna ruhrel te siam mek a ni chu lawmawm a tih thu a sawi a. Heng Project pawimawh tak tak te hi mipuiin an chhawr tangkai thuai theihna turin a thawktute chu tan la sauh sauh turin a chah a ni. PMAY (U) kalpui dan pawh hna a tha tawk nia a hriat thu sawiin, Sawrkar in a thawhna tur sum Department hnena a thun veleh khawmuang lovin project kalpuituten chak takin hna an chhunzawm erawh a ngai nia a hriat thu a sawi a. PMAY(U) kalpui mek chuan khawpui-a cheng chenna In la nei lo mi harsa, In hmun la neilote pawh huam tir dan zawn ni se a duh thu a sawi bawk a ni.

He hunah hian UD&PA Secretary K. Lalthawmmawia chuan UD&PA hnuaia hmasawnna ruhrel khawih mek leh hmalakna kalpui mek tlangpui te a lem nen a tarlang a, hei bakah hian Smart City Project chuan North Eastern Region Urban Development Programme (NERDUP) hnuaia State Investment Programme Management & Implementation Unit (SIPMIU) project hrang hrangte leh Mizoram-a Prime Minister Awaas Yojana - Urban (PMAY -U) hmalakna te pawh thawktu dang ten an tarlang bawk a ni.

UD&PA hnuaiah hian cheng vbc. 5 aia tam senna tur Project lian 9 leh a laihawl, cheng vbc. 1 - 5 senna project 12 leh Project tenau zawk (Minor works) 1024 a awm mek a. Swachh Bharat Mission (SBM) hnuaia hmalakna ah khawpui lian deuh 23 te chu ODF Town atan Ministry of Housing and Urban Affairs chuan a puang tawh a. Khawpui lian zawng zawngte hi ODF Plus a puan a nih theih nan chak taka hmalak mek a ni a, SBM 2.0 pawh kalpui tan niin hei hi October 1, 2021 leh October 1, 2026 chhunga puitlin tura tih a ni.

Aizawl khawpui tawt lutuk tihziaawmna atana lirthei hunna siam hna, PAHOSS pawh chak takin kalpui niin cheng nuai 1,144.30 pekchhuah ni tawhin hmun 15-ah lirthei hunna tur siam zawh a ni tawh a. District Hqrs. 11 leh Census Town 3-ah te DAY-NULM hmangin thuang 6 hmalakna hmangin hmasawnna rahbi tuk mek a ni a. Aizawl khawpui bikah AMRUT hnuaiah khawpui tihhmasawnna atan cheng vbc. 140.25 (Central Assistance cheng vbc. 126.22 leh SMS cheng vbc. 14.025) project thawh mek a ni bawk. PMAY-U ah Beneficiary 38,668 awmin heng mite in sakna tur hmun 27,731 chu Geotag a chhinchiah tawh a ni a, beneficiary te zinga 2,928 ten an in an sa zo tawh a ni.