Serchhip District-a ‘Project Thlai leh Thei’ kalpui dan tur inhrilhhriatna neih a ni

Serchhip District Bawrhsap Pisa bultuma ‘Project Thlai leh Thei’ kalpui tur atana thawktu turte lak an nih hnuah heng hnathawktu turte tana he Project inhrilhhriatna chu nimin khan Serchhip Bawrhsap Nazuk Kumar IAS hovin a Pisa-ah neih a ni a, he hunah hian Serchhip SDO (Sadar) Lalzikpuii pawh a tel a ni.

Serchhip District chhunga loneitute thlai chin hrang hrang zirchian a, chhinchhiah fela, tih hmasawnna tura ruahmanna ‘Project Thlai leh Thei’ tia vuah chungchang inhrilhhriatna hun hi nimin chawhnu dar 2:00 khan Serchhip District Bawrhsap Nazuk Kumar IAS hovin a Pisa-ah neih a ni a, Bawrhsap chuan tunhnai a ‘Project Thlai leh Thei’ kalpui tura thawktu lak thar te hnenah Project kalpui tum anih dan te sawiin, he Project hi thla thar atanga kalpui tan tum a nih thute, hna hmasa ber atan Baseline Survey tih a nih tur thute sawilan a ni aa, hnathawh chhunzawm zel dan tur chu College of Horticulture, Thenzawl ruahmanna anga kalpui anih tur thute sawilan a ni bawk.

Serchhip DC Office bultuma ‘Project Thlai leh Thei’ kalpui dan tur chungchang sawihona hmasa hi hi July ni 5, 2021 khan khatih laia Serchhip District Bawrsap, Kumar Abhishek IAS hovin neih alo ni tawh a, he Project hnuaiah hian Serchhip District chhunga thlai chin zirchiangin tih hmasawnna tur leh hlawk zawka hralhna tur ngaihtuah thlengin hmalak tum a ni.

‘Project Thlai leh Thei’ tia vuah he rua-hmanna hi Serchhip District Bawrhsap hmalakna in Social Welfare & Tribal Affairs Department kaltlangin Ministry of Tribal Affairs, Govt. of India ah thehluh a ni a, sawrkar laipui hian he Project hi pawmin, Serchhip Deputy Commissioner leh Tribal Research Institute, Mizoram te chu Nodal & Executing Department an ni a, Horticulture Department Mizoram, Mizoram University (MZU), College of Horticulture Thenzawl leh Expert Agency dangte nena thawhhona tura duan niin Project Monitoring Unit leh Project Implementing Unit te neiin hmalak dan tur mumal taka duanfel sa a ni a. He project atan hian Research Associate turin mi 1, Market Assistant-ah mi 2, Research Investigator-ah mi 3 leh Data Entry Operator-ah mi pakhat lak an ni.