International Yoga Day pualin hun hman a ni

Nimin June ni 21, 2022 kha ‘International Yoga Day’ niin hmun hrang hrangah he ni pual hian hun hman a ni.

Serchhip-a awm 8th Assam Rifles te chuan nimin-a International Yoga Day denchhen khan Serchhip Bazar-ah hun an hmang a, he hunah hian Band Display te neiin mipui an awi a, hei bakah hian an hmunhmaa PT Ground-ah hun an hmang bawk a, he hunah hian hrisela atana Yoga thatna te inzirtirna neih niin a taka entirna hun hman a ni bawk. Nimin vek khan Company Base hrang hrang, Champhai, Khawbung, Far-kawn, Thingsai leh Sangau-ah te he ni pual hian hun an hmang bawk a ni.

International Yoga Day 2022-ah hian ‘Yoga for Humanity’ tih chu thupui-ah hman niin he ni denchhen hian nimin zing khan Aizawl-a Raj Bhavan Auditorium-ah Mizoram Governor Hari Babu Kambhampati hovin hun hman a ni bawk a, he hunah hian Governor chuan Zoram mipuite chibai bukin duhsakna a hlan a. Mitin te kan lo hrisel zawk nan Yoga insawizawina kan tuipui theihloh pawhin taksa insawizawina engmaw tal kan kan tih thin a pawimawh hle tih a sawi a ni.

International Yoga Day pual hian Then-zawl-a Horticulture College te pawhin nimin zing khan Assistant Professor Dr. CG. Sawant kaih-hruaiin an College Auditorium-ah hun an hmang a, he hunah hian DEAN Dr. Shri Dhar chuan India rama Yoga kalpui anih dan tlangpui te, Yoga thatna leh pawimawhna te sawiin, College of Horticulture Staff leh zirlai ten Yoga hi an ti nghal bawk a ni.