Serchhip District Hospital sakna tura rawt-a Eng, Tui leh kawng siam dan tur en ho a ni

Serchhip NGO Coordination Committee ten Serchhip District Hospital sakna atana an rawt, Serchhip Bukpui ram-a Tui leh Eng pekna tur leh kawng laihna tura tul pawimawh te nimin chawhnu khan sawrkar Department aiawh ten a hmunah an thlirho.

Nimin-a Bukpui ram an tlawhna ah hian Serchhip Addl. DC Lalmuansanga Ralte chuan Serchhip District Hospital sakna atan hian sum hmu turin inremna ziah a ni tawh tih sawiin, Bukpui-ah hian Hospital lo sa ta ila Hospital building ni lo thildang, Medical Officer leh Staff te chenna tur te, Tui, Eng leh Kawng siamna atan te senso engzat nge dawn tih hriat nan Department hotute nen an tlawh tih a sawi a. Heng Department te hi tunkar chhungin Preliminary Assessment siamin Serchhip DC Office-a thehlut tura tih an ni tih a sawi a, sawrkar hotu ten thutlukna an lo siamna atan hei hi sawrkar-ah thehluh ve leh anih tur thu a sawi.

Nimin-a helai hmun tlawhna ah hian Serchhip Addl. DC Lalmuansanga Ralte bakah SDO (Sadar) Lalzikpuii, P&E Department atangin Er. Laltlanthanga, PHE atangin Er. F. Lalsanglura, PWD atangin Er. R. Zirsangliana, Revenue Department atangin Settlement Officer Lalrinsanga Hnamte, DRDA atangin David Zodingliana AE leh Aizawl-a Health Department atangin Er. H. Lalfakzuala EE leh Er. R. Laltleipuia AE bakah Serchhip atangin DMS Dr. ZD. Lalmuanawma leh District Immunization Officer Dr. Lalngaihawmi Chhangte te an tel a, Serchhip NGO Coordination Committee hruaitute leh Chhiahtlang South VC aiawhte pawh an tel a ni.

Health Department-a thawktute chuan Hospital sakna atana rawt Bukpui ram hi sq.meter 53,466 vela zau nia chhut a ni tih sawiin, tuna Serchhip District Hospital awmna hmun hi sq. meter 30,919 vela zau a nih thu an sawi a, Hospital building bakah hian Staff te chenna turin a lo berah Building lian tak tak, Building pakhat-a chhungkaw 6 vel chen theihna tur Building 14 vel sak a tul dawn thu an sawi a. Serchhip District Hospital hman mek chhuahsan chungchang ah sawrkar thutlukna ang anga an kal tur thu LENKAWL zawhna chhangin Serchhip-a Health Department hotute chuan an sawi a, tun dinhmunah chuan Emergency-a pan theih tur chu awm tura an ngaih thu an sawi a ni.

P&E Department hotute chuan Bukpui atangin a hrana 11kV Line hmanga Eng pek hi a tul dawn thu sawiin, Hospital leh Staff Quarters tan hian Electric Transformer hran ve ve mamawh a nih dawn thu an sawi a, helai hmuna 132kV Line pawh sawn nise tiin rawtna an siam a. PHE Department te pawhin helai hmuna Tui pekna atan hian Line hran siam an mamawh dawn thu sawiin, Khawtetlang-a Main Reservoir atanga pek a tul dawn thu leh Chhiahtlang lam Tui pekna nen a hranga kaltir a tul dawn thu an sawi a. PWD hotute chuan Health Department in Damdawi In leh Quarters an ruahman anga kawng hi an laih tur thu an sawi bawk a ni.