Serchhip District-ah ASF vanga Vawk thi tam tawhin hmalak dan tur sawihona neih a ni

Nikum (2021) khan African Swine Fever (ASF) avangin Serchhip District-a khaw 35-ah Vawk 3899 thiin Vawk 3138 suat a ni a, kumin (2022)-ah khaw pahnih-ah Vawk 39 thi tawhin Vawk 34 suat a ni tawh bawk a, Serchhip leh North Vanlaiphai-a Vawk thi te chu ASF vanga thi an nih leh nihloh finfiah turin an Sample thawn mek a ni.

Vawk natna chi khat, African Swine Fever (ASF) leng mek chungchangah nimin khan Serchhip District Level Co-ordination Committee chu an Chairman leh District Bawrhsap Nazuk Kumar IAS hovin Serchhip DC Meeting Hall-ah an thukhawm a, Bawrhsap chuan ASF hri leng mek chu ngun taka ngaihtuaha beng kan chhit reng a ngai tih sawiin, hemi kawngah hian VC leh YMA te chu anmahni huamchhung theuh a Vawk thi, a hri vei an awm leh awmloh te uluk taka lo thlithlai chhunzawm zel turin a sawm a. Ramsa, a bik in Sanghal ten he hri hi an kai ve theih avangin Forest Department lama thawktute pawh beng lo chhi tura sawmin, Forest Department hotute chuan Range Officer tin te chu hemi chungchang hi hriattir an nih tawh thu an sawi bawk.

He thutkhawm ah hian Serchhip DVO Dr. R. Lalmakthanga chuan Serchhip District-a ASF hri len tawh dan tarlangin, nikum April 1 khan Keitum khua a Vawk thi atangin ASF hri hi hmuh niin hei hi Serchhip District-a ASF hri kai hmuh hmasak ber a ni a, hemi atanga nikum December 21 thleng khan ASF avanga Vawk thi hi hriat tur awmin, hemi chhung hian ASF hri vangin Vawk 3899 thiin Vawk 3138 chu suat a ni bawk a, ASF hri hi khaw 35-ah hmuhchhuah niin chhungkaw 1642 a tihbuai thu a tarlang bawk. Kum kalta chhunga ASF vanga Serchhip District-a Vawk thi hlutna chu cheng Vbc. 30 chuang hu anih thu leh Thenzawl ram-a Sanghal thi an hmuhchhuah te chu September ni 1, 2021 khan ASF hri kai an ni tih hmuhchhuah an nih thute a tarlang tel bawk.

Kumin ah District chhunga khaw pahnih, Bawktlang leh Sailulak-ah ASF vanga Vawk thi an awm tawh thu pawh sawiin, Bawktlang-ah hian Vawk 6 thi tawhin 25 suat tawh a nih thu leh Sailulak-ah Vawk 33 thi tawhin Vawk 9 suat an nih tawh thu a sawi a, heng khua te hi hri lenna ah puan a nih tawh thu sawiin, North Vanlaiphai leh Serchhip Leisang Veng-a Vawk thi te atangin Sample endik mek an nih thu a sawi bawk.

He Meeting-ah hian ASF hri leng avanga hmalak dan tur hrang hrangte thlirho niin ASF darh zel tur venna atan khapna thupek lo chhuah tawh te chu khauh taka kenkawh leh a ai a khauh zawk khapna thupek chhuah te pawh a tul anih chuan tih nise an ti a, ASF hri leng a lo awm thulha rang taka hma latu tur Rapid Response Team din chungchang te, khaw hrang hranga Vawk thi phumna tur hmun siam leh hri leng chungchang mipui inzir
tirna zau zawka kalpui dan turte sawiho a ni.