Serchhip District Hospital a hmun ngai ah sak duh

Serchhip NGO Coordination Committee chuan khum 100 awmna Serchhip District Hospital sak tura hmalakna kal mekah NGO leh khawtlang hruaitu, VC ten a hmun tura an thlan tawh, Bukpui ram-ah ngei sak a nih theih nan hmalak chhunzawm zel nise an ti.

Serchhip-a tlawmngai pawl - YMA, MUP, MHIP, MZP leh MSU telna Serchhip NGO Coordination Committee hian niminpiah chawhnu khan Serchhip Sub-Hqrs. YMA Meeting Hall-ah thutkhawm neiin Serchhip District Hospital sakna tura hmalakna kal mek chungchang hi an sawiho a. Serchhip District Bawrhsap hova RKS Governing Body thukhawm in District Hospital sakna tur chungchanga thutlukna siam tura NGO Coordination Committee te a tih anga Serchhip-a NGO hrang hrang leh Town chhunga VC hrang hrang ten Bukpui-a Ram awl-ah Hospital building thar sa tura an thlan hnuah Power Grid Corporation leh Mizoram sawrkar in Memorandum of Understanding (MoU) an ziak ta tih an sawi a. Hetihlai hian VC leh NGO kalkhawm ten Hospital sakna atan an thlan ni lo, a hmun ngaia sak tumna a awm nia an hriat thu sawiin, hei hi tha an tih loh thu leh pawi an tih thu an sawi a. Town chhunga VC leh NGO ten Hospital sakna tura an thlan ngeiah Hospital hi sak ngei a nih theih nan hmalak zui nise an ti a, hemi chungchang hi Chief Minister leh Health Minister te hnenah pawh thlen nise an ti a, NGO Coordination Committee hruaitute pawh sawrkar thuneitute dawr tura kal nise an ti bawk.

He thutkhawm ah hian District Hospital sakna atana DPR leh Drawing chungchang pawh sawiho niin, tuna Drawing siam chu a chhe hle tih an sawi a, Ward tura ruahman a zim thu leh a chhawng chung chhohna tura ruahman te pawh a tha tawklo nia an hriat thu an sawi bawk a. Hospital sakna atana ram an lo thlan tawh ah hian Vawiin, June 4, 2022 khian hnatlangpui neiin a hmun samfai hna thawh nise an ti bawk.

NGO Coordination Committee hian Serchhip-a naupang Doctor, Dr. K. Vanlalhriati sawn tum chu an phut anga amah thlaktu dah a nih loh avangin a insawn tur dan nise an ti bawk.