Kum 11 chhungin Childline in case 2422 buaipui, hripui hnuah tleirawl kawng diklo zawh pung

Childline Mizoram chuan kum 11 kalta, kum 2011 atanga March 2022 inkar chhung khan case 2422 buaipuiin Case an buaipui zingah hian naupang nu leh pa ruihtheih thilin a tihbuai te chu a tam ber an ni a. Hripui len hnuah tleirawl hmeichhia kawng diklo zawh an pung niin an sawi bawk.

Childline Mizoram -a thawktute chuan kum 11 kalta chhung khan naupang harsatna an chinfel zingah Protection From Abuse (PFA) chu a tam ber niin case 627 an buaipui a, hei hi case an buaipui zawng zawng atanga chhutin za zela 25.88 a tling a. PFA hian naupang khuaikhem te, kutthlak leh tihduhdah bakah ngaihsak loh te a huam a ni. 

PFA dawtah hian naupang tanpui ‘sponsorship’ chu case an neih tam ber a ni a, case 591 neiin hei hi a pumpui atanga chhutin zaa 24.40 a tling a. Sponsorship-ah hian naupang harsatna tawk tanpui leh an mamawh dan a zira eitur ngaihtuah sak te a tel a. Sponsorship case a tam chhan hi COVID-19 vanga naupang tam takin ei leh in lama harsatna an tawh vang niin an sawi bawk. Childline in case an buaipui zingah kum 2020-2021 chhunga an buaipui chu a sang fal hle a, hemi kum-a an case a san chhan hi Covid hri leng vanga naupang puih ngai an tam vang a ni a, hemi kum hian naupang 398 an buaipui a ni.

Childline-a thawktute sawi danin an tanpui naupang zingah hian nu emaw, pa emaw zu leh ruihtheih thilin a tihbuai te chu a tam ber niin an sawi a. “Nu leh pa ruihtheih thil ti te chuan an fate an ngaihsak lo tlangpui a, hei vang hian naupang pawhin harsatna an tawk nasa in kan buaipui tam ber pawh an ni,” an ti. Zawhna chhangin case an buaipui zinga a tam ber chu veng tlabirh lam an ni tih sawiin, “A tlangpuiin Veng tlabirh leh mawng lamah hian case kan ngah a, chutih rualin Veng changkang tak taka ngaihah pawh an awm bawk a. Heng kan buaipui te hi nu emaw, pa emaw ruihtheih thil ti leh nupa inthen an ni tlangpui a ni,” an ti bawk. Naupang harsatna tawk te chu an case a zirin Child Welfare Committee-ah emaw, Juvenile Justice Board-ah te an hlanchhawng a, a tuartu lam chuan zangnadawmna an dawng ve thin bawk.

COVID-19 a ziaawm hnuah hmeichhe tleirawl nun kawng dik lo zawh an pung tih sawiin Childline thawkte chuan, “COVID-19 a ziaawm hnu nikum tawp lam atang khan hmeichhe tleirawl intawllen a chhuak an tam a. Heng ho hian ruihhlo an tih bakah sex lamah an kal nasa a. In chhuahsan an tam chhan hi inkhung an nin tawh vang leh School kal mumal loh vang niin kan hria a ni,” an ti bawk. Childline helpline No. 1098 hi Kolkata-ah an awm a, a hma chuan Mizo thawk 2 awm thin mah se tunah chuan thawktu an awm tawh loh avangin Ph. 9774222275-ah darkar 24 chhung biak pawh theih an ni a. 1098-ah hian Mizoram atanga bia an awm chuan Mizoram lamah an hersawn (divert) ve thin bawk a ni.

Comments

Popular News (Last 30 Days)

Vawiin-ah HSSLC Exam result