Serchhip-ah World Blood Donor Day hmangin thisen pe tam te chawimawina hlan an ni

Thisen petute tana ni bik khawvel puma hman thin, World Blood Donor Day chu nimin June 14, 2022 khan hman leh niin Serchhip-ah pawh he ni pual hian thisen pe tam pawl hrang hrangte hnenah chawimawina hlanin thisen pek uar a pawimawh zia inzirtirna atan hman a ni.

Serchhip CMO Conference Hall-a World Blood Donor Day puala inkhawm Association for Voluntary Blood Donation (AVBD) Serchhip Branch leh District Hospital Blood Bank, Serchhip te buatsaiha neih hi AVBD Serchhip Branch Secretary Hmingthansiama chuan kaihruaiin he hun khuallian nia hmanpuitu District Medical Superintendent Dr. ZD. Lalmuanawma chuan tunhma lamin Blood Bank te kan neih loh avangin damlo thisen mamawh ten thisen an hmuh theihna turin thisen pe tur zawnchawp thin an ngaih thu leh hmuh zawh loh chang te a awm thin thu sawiin, tunah hian Blood Bank te neiin AVBD te hmalakna leh mi tlawmngaite zarah damlo te pawhin an mamawh ang thisen a hun takah an hmuh theih thin tawh avanga lawmawm a tih thu a sawi a. Thisen pek chu mihring nunna chhanna a ni tih sawiin, hei vang hian thisen pek hi kan uar zel a pawimawh thu leh sawrkar damdawi In-ah te chuan Processing Fee lak ni lovin damlo ten a thlawna thisen hi an hmuh theih thu a sawi a ni.

He hunah hian Serchhip Blood Bank Officer Dr. Lalnunhlima Khiangte chuan Serchhip damdawi In in thisen an hmuh leh pekchhuah dan te tarlangin, sawrkar kum liamta, April 1, 2021 atanga March 31, 2022 chhung khan Serchhip Blood Bank in thisen an dawn zawng zawng chu Unit 1077 a nih thu leh hemi chhung hian Blood Donation Camp tum 35 neiin heng ah hian thisen Unit 827 lak a nih thu a sawi a. Mi tlawmngai mahni-a Blood Bank-a kala thisen pe 151 an awm thu leh Unit 99 te erawh chu mi tute emaw tan bika thisen pek a nih thu a sawi a, hemi chhung hian thisen Unit 1005 pekchhuah a nih thu a sawi bawk.

He hunah hian AVBD Serchhip Branch Vice President Zonunsanga Kawlni pawhin damlo thisen mamawh ten an mamawh hun ang zelah thisen an hmuh theihna tura hmalak chu an pawl dinchhan ber anih thu leh thisen pek zawng zawngte Voluntary Donation ni tura hma an lak thu te a sawi a. Blood Bank chu mipuite tan a ni tih sawiin, thisen mamawhna a san zel avangin thisen pek uar deuh deuh a pawimawh thu a sawi bawk.

World Blood Donor Day hi kum 2005 atang khan hman thin niin kumitn thisen pe tam te chawimawina atan leh thisen pek a pawimawh zia innzirtirna atan hman thin a ni a, Serchhip-ah chuan kum 2 chhung hman theih a nih tawh loh avangin kum 2019 April thla atanga kumin March 31 inkara pawl hrang hrang thisen pe tam pawl hrang hrang te hnenah chawimawina thilpek hlan an ni a. He hunah hian AVBD Member leh Blood Bank-a thawk te bakah Brillian HSS-a zirlai bakah Serchhip-a MJA Member te an tel bawk a ni.

Chawimawina dawng leh thisen pek zat :

Religious Group :

1. Vengchung Pastor Bial KTP (419)

2. Serchhip Pastor Bial KTP (329)

3. Serchhip Bial PYD (108)

Education/Institute Group :

1. NSS Govt. Serchhip College (189)

2. NSS Govt HSS (65)

3. NSS Brilliant HSS (53)

YMA Group :

1. Thentlang Branch YMA (50)

2. Chhingchip Venghlun Branch (35)

3. S. Hmar Veng Branch YMA (30)

3. S. Vengchung Branch YMA (30)

Miscellaneous Group :

1. PTS, Thenzawl (37)

2. MNYF Serchhip Block (28)

3. S. Auto Rickshaw Owners Assn. (23)