ASF lenna hmun puan belh; Mipuite fimkhur turin ngen

Serchhip District-a North Vanlaiphai khua chu ASF hri lenna ah puan leh a ni a, AH&Vety Department hotute chuan Vawk hri, African Swine Fever (ASF) leng mekah mipuite chu fimkhur turin an ngen thar leh tih an sawi.

North Vanlaiphai khuaa tunhnaia Vawk thi thenkhat te an Sample enfiah tura thawn a nih hnuah heng Vawk thi te hi Vawk hri leng mek, African Swine Fever (ASF) vanga thi an ni tih finfiah a ni a,  he hri hi a darh zel loh nan Serchhip DVO Dr. R. Lalmak-thanga chuan ‘The Prevention & Control of Infectious and Contagious Disease in Animal Act 2009, Section 20 Sub-Section 1’ in thuneihna a pek angin nimin June 14, 2022 atanga thu leh awm hma atan North Vanlaiphai khua chu Vawk hri lenna hmunah a puang a. He khua atanga Vawk Vawk lakchhuah leh lakluh khap niin Vawk talh leh Vawksa zawrh te pawh khap a ni bawk.

North Vanlaiphai khua ah hian Vawk thi 6 awm tawhin a dang 5 chu suat a ni tawh a, Serchhip District-a khaw 3 chu ASF hri lenna hmunah puan a ni ta a ni.

Hetihlai hian AH&Vety Department hotute chuan Serchhip District-a ASF hri lenna khua te bakah tunhnai khan New Serchhip dai a Vawk vulhna hmun pakhat a Vawk damlo chu enfiah a nih hnuah ASF nia rinhlelh a nih avangin Sample enfiah tura thawn leh mek a ni tih an sawi a, hei vang hian an Vawk vulhlai thenkhat te pawh suat a ni tih sawiin, Serchhip-ah ASF hri hi leng leh palh thei a nih avangin mipuite, a bik takin Vawk vulhtute chu lo fimkhur lehzual turin an chah tih LENKAWL an hrilh a ni.