Ration Card leh Aadhaar Card thlunzawm lo te Ration pek an ni tawh dawn lo

Mizoram-ah Ration Card leh Aadhaar Card thlunzawm lo te chu Food, Civil Supplies & Consumers Affairs Department chuan Ration pek an ni tawh dawn lo tih an sawi.

RTI hmanga zawhna chhangin Food, Civil Supplies & Consumer Affairs Department chuan Ration Card leh Aadhaar Card thlunzawm hna chu May, 2022 thleng khan 91.37% thawh zawh tawh a ni tih an sawi a. Ration Card leh Aadhaar Card thlunzawm lote chuan Biometric Authentication kaltlangin Ration an la thei tawh lo tih an sawi a. Aadhaar Seeding (Aadhaar number leh document pawimawh thlunzawm lo) ti lote chu Ration pek an nih tawh dawn loh thu hi ni 28.03.2022 khan Order tihchhuah a ni tawh tih an sawi bawk.

RTI zawhna an chhannaah FCS&CA Department chuan Mizoram-ah Sakhuana leh thil dang vanga Ration Card nei duh lo an awm leh awm loh Department chuan a hre lo tih an sawi a, Ration Card nei duhlo te tan sawrkarin buhfai leh thil dang tun dinhmunah chuan pek tumna a nei lo tih an sawi bawk. 

Tun dinhmunah Mizoram pumah Sawrkar hnuaia Ration Card nei chhungkua 2,81,592 an awm mek a, heng zinga 1,15,077 chu Ration Card Var (Non-FSA) an ni a, Ration Card Pawl nei (PHH) 1,40,967 awmin Ration Card Eng (AAY) nei 25,548 an awm bawk. One Nation One Ration Card chu ni 1.6.2020 atangin Mizoram-ah kalpui tan a ni a, tun dinhmunah chuan One Nation One Ration Card-ah harsatna a awm lova. May, 2022 bik khan One Nation One Ration Card hnuaiah transaction 205 a awm tih an sawi bawk. Mizoram-in thla khat chhunga buhfai a mamawh zat tlangpui chu quintal 96,857.74 a nih thu leh Ration Card awm zat azirin hei hi a danglam thin tih pawh an sawi a. Sawrkarin thla khatah buhfai leina atan Rs. 14,08,57,888 vel a hmang tlangpui a, hei pawh hi Monsoon Stock lai leh lei tlem lai chuan a danglam thin tih an sawi bawk. 

Comments

Popular posts from this blog