Mizoram-ah COVID-19 kai enkawllai 167 awm mek

Niminpiah khan Mizoram-ah COVID-19 hri kai mi 41 zet hmuh belh leh an ni a, nimin tlai thleng khan hri kai enkawllai mi 167 an awm leh tawh a ni.

Niminpiah khan Mizoram-ah Sample 272 enfiah niin heng atang hian COVID-19 hri kai mi 41 hmuhchhuah an ni a, Sample enfiah atanga chhutin za zela 15.01 te chuan hri an kai a ni. Niminpiah a hri kai hmuhchhuah zinga 40 te hi Rapid Antigen Test hmanga Sample enfiah 259 atanga hmuh te an ni a, Aizawl District-ah hri kai mi 30 hmuh niin a tam zawk hi Aizawl khawpui chhunga mi te an ni a, Saitual District-ah hri kai mi 4 hmuh niin Lunglei, Kolasib leh Hnahthial District-ah hri kai mi pahnih theuh hmuh an ni bawk. Hei bakah hian ZMC-a RT-PCR Laboratory-ah Sample 11 enfiah awmin hri kai mi pakhat hmuh a ni a, Aizawl District mi a ni.

Nimin khan Mizoram District 6-ah COVID-19 hri kai enkawl dam mi 21 an awm belh ve leh bawk a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,28,945 niin an zinga 2,28,075 te chu enkawl dam an ni tawh a, hri kai hmuhchhuah te atanga chhutin za zela 99.62 te chu enkawl dam an ni tawh a, hri kai enkawllai mi 167 la awmin hri kai zingah mi 703 chu an boral tawh bawk a ni.