NHIDCL in Mizoram-a kawng siam hna an thawh a lungawi loh lantirna Serchhip-ah neih a ni

Mizoram-a Social Activist Vanramchhuangi, Ruatfela nu tia hriat lar leh Serchhip leh Lunglei-a Thalai Pawl te chuan nimin khan Serchhip Press Club-ah thuthar thehdarhtute kawmin NHIDCL in Mizoram-a kawng siam hna an thawh meka an lungawilohna te an sawi a, hemi hnu hian Serchhip DC Ofice Tual-ah lungawi loh lantirna an nei nghal bawk.



Nimin-a Serchhip Press Club-a thuthar thehdarhtute a kawmna ah hian Vanramchhuangi chuan kum 25 vel zet hetiang hian khawtlang tan a lo beih ve tawh thu sawiin, Mizoram-a kawngpui laih te pawh an lo vil ve thin thu leh NHIDCL in Mizoram-a kawngpui laih hna hrang hrang an lo thawh te pawh kum 2020 atanga an lo en thu a sawi a, heng kawngpui an laiha leivung paih dan chungchangah Dan zawmlohna a nasat thu leh an kawng laih vanga leivung an paih in thing leh mau a tihchhiat chu chhiarsen a ni lo tih a sawi a, “Leivung hian kawrte (perenial & seasonal river) pawh 100% a chhilh bo vek a, heng kawrte-a leivung inchhekkhawlte hi luipui-ah luang lutin chirh a inchhekkhawl a, lui dunga nungcha tam takten an thih phah,” a ti a, heng zawng zawng hi siamthat an phut thu sawiin, he an thilphut hi PCCF-ah pawh thlenin lungawilohna pawh an Pisa tual-ah ni 2 a lo lantir tawh thu a sawi a, hei vang hian Environment, Forest & Climate Change Department chuan hmun thenkhatah hnathawh chawlhsan tura thupek an pe tawh thu leh he hna vil (monitoring) kawnga mawhphurtu tura ruat District Bawrhsap-te chu an inthlahdah thu a sawi a, “Compensation chiah an buaipui a, Dan an zawm em tih an enpui lo niin a lang,” a ti a. An hnathawh mek chawlhsan tura tih ringawt chu a tawk loh thu leh kan Environment an tihchhiat siamthat a nih theih nana sawrkar hmalak dan chu enzui zel a ngai dawn tih a sawi bawk a. Heng an leivung paih nghawng hi Vawiin a mi te chuah ni lovin kan thlah te zel pawhin an la tawrh dawn thu a sawi bawk.


Vanramchhuangi hian Ningani khan Serchhip a rawn thlen thu leh Serchhip Thalai Pawl te nen NH. 54 laih meka leivung paih dan te a hmunah an en nghal thu pawh sawiin, Tuikum lui-ah leivung tam tak a lut dawn tih chiang a, Zawlpui phaia leilet neitute pawhin kawng laih tan hmain hemi chungchanga harsatna thleng thei tur chungchanga hmala tura ngenna District Bawrhsap hnena an lo thlen daih tawh laia tun dinhmun an thleng leh si chu hemi kawnga mawhphurtute demawm a tih thu a sawi bawk.

NHIDCL-ten an hnathawh mek ah Mizo mipuite hmusit taka min namnul chungchanga sawrkarin hmalakna a neih loh chungchangah “Min zah loh chhan an nei a ni mai,” a ti a, NGO thenkhatte pawhin NHIDCL sum bawm an zenpui nia an hriat thu sawiin, sawrkar lamah pawh hetiang hi a awm nia an hriat thu leh hemi chung-chang hi zirchiang mekin evidence an neih hunah tlangzarh an tum thu a sawi bawk.

He hunah hian Serchhip Thalai Pawl ten Save Tuikum & Mat Project a kalpuia Project Co-ordinator Laldinpuia leh Lunglei Thalai Pawl a Chief Organiser Lalduhawma Pachuau-te pawhin NHIDCL-ten kawng laih hna an thawhnaa dân lo ang hna an thawh dan hrang hrangte an tarlang ve bawk a ni.

Serchhip-a thuthar thehdarhtute an kawm zawh hnu hian Vanramchhuangi leh heng District pahnih-a Thalai Pawl hruaitute hian Serchhip DC Office Tual-ah NHIDCL kawng laihin environment a tihchhiat nasat vanga hma la tura DC phûtin lungawi lohna an lantir a, STP chuan Serchhip DC hnenah NHIDCL-ten dân bawhchhiaa kawng laih hna an thawhnaa action la tura ngenna lehkha an thehlut nghal bawk a ni.

Vanramchhuangi hian nimin chawhnu lam khan Serchhip Zawlpui phai pawh tlawh nghalin Serchhip leh Keitum inkar-a leivung paih in Zawlpui phai a nghawng dan te a hmun ah a thlir nghal bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man