MSHCS ngaihsak loh vangin bill ba cheng vbc.71 a awm phah niin MPCC in an sawi

Mizoram Pradesh Congress Committee (MPCC) chuan Chief Minister leh Health Minister ten Mizoram State Health Care Scheme an ngaihthah em avangin dam lo bill ba, cheng nuai 7100 (vbc. 71) chuang a awm phah nia sawiin, Mizoram leiba tipungtu a nih tur thu an sawi.

MPCC thupuangtu Dr. Lallianchhunga chuan Inrinni khan Aizawl Press Club-ah thuthar thehdahtute kawmin Congress sawrkar lai khan mi rethei zawkte pawhin Health Care kha a takin an chhawr tangkai nia saiwin, tuna MNF sawrkar hnuaia harsatna lian tham an tawh ang hi a awm ve lo niin a sawi a. Congress party kaihhruai hmalakna sawiin, “March 30,2010 atangin Corpus Fund (sum bawmpui) tha tak siamin, Asian Development Bank (ADB) atanga sum hmuh cheng vbc. 117.80 leh a tira Mizoram State Health Care Scheme (MSHCS) atana an dah cheng vbc. 50 atanga an hman bang, a vaiin cheng vbc. 149.6 in bul tan that leh a ni a, heta pawisa pung atangin dam lo bill ba pek thin a ni,” a ti.

Chief Minister in ‘Congress sawrkar in MSHCS ah sum an dah lo’ nia a sawi chu thu diklo a ni tih pawh sawiin, “RTI hmanga zawhna siam Finance Department in an chhanna ah kum 2018-19 chhungin CSS leh State sum atangin Health care atan hian nuai 539.46 an dah tih an sawi a ni,” a ti bawk.

Hei bakah hian MPCC thupuangtu Dr. Lallianchhunga chuan MNF sawrkar lai hian Health Care Scheme-ah harsatna a thleng ziah nia sawiin, “Kum 2008 Sept 26-ah pawh MNF sawrkar hnuaia dam lo bill peka harsatna awm chungchang chu langsar takin chanchinbu te pawhin an chhuah hial,” a ti a. “Congress Ministrý in Mizoram State Health Care Scheme (MSHCS) a siam that hnuah dam lo te'n bill lakah harsatna lian tham an tawk ngai lova. Mahse, kum 3 awrh MNF a sawrkar chhungin dam lo bill pek theih loh cheng nuai 7100 chuang a tling khawm hman a ni,” a ti bawk.

Comments

Popular posts from this blog

Bialtu MLA in Laptop pe