Nikum April 7 hnua a vawi khatna atan Serchhip District-ah COVID-19 hri kai enkawllai an awm lo

Serchhip District-a COVID-19 hri kai enkawl mi pakhat chu nimin khan enkawl dam a ni ve leh ta a, heti hian nikum April 7 hnu lamah a vawi khatna atan Serchhip District-ah COVID-19 hri kai enkawllai an awm lo ve leh ta a ni.


Nimin a Serchhip District-a COVID-19 hri kai enkawl dam hi tun thla ni 10-a hri kai hmuhchhuah kha niin East Lungdar khua a ni a, nimin khan Serchhip District-ah COVID-19 hri kai hmuh belh an awm loh avangin hri kai enkawllai hi an awm ta rih lo a ni. Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,009 niin an zinga 13,974 te chu enkawl dam an ni tawh a, hri kai hmuhchhuah zawng zawng atanga chhutin za zela 99.75 te chu enkawl dam an ni a, hri kai zingah mi 35 boral tawhin hri kai atanga chhutin zaa 0.24 te an boral thung a ni. Serchhip District-a COVID-19 hri kai hmuhchhuah boral mi 35 te hi Serchhip Town chhungah mi 12 (Chhiahtlang pakhat telin), Thenzawl 10, Chhingchhip 4, North Vanlaiphai leh East Lungdar-ah mi 2 ve ve leh Khawbel, Neihloh, Bungtlang leh Lungpho-ah mi pakhat theuh an ni a, District dang mi, Serchhip District-a hri kai hmuhchhuah leh boral mi pakhat awm bawkin Serchhip District mi leh sa, District dang-a COVID-19 hri kai hmuhchhuah leh boral zui ta mi 4 an awm ve bawk a ni.

Chhinchhiahna atanga a lan danin Serchhip District-ah hian June 9, 2020 khan COVID-19 hri kai hi a hmasa ber atan hmuhchhuah niin RT-PCR Laboratory atangin hri kai hi hmuh a ni a, Serchhip District-ah Sample enfiahna a awm mai loh avangin August 25, 2020 thlengin RT-PCR Laboratory-a Sample thawn atangin COVID-19 hri kai hi mi 15 hmuh an ni a, September 6, 2020-ah a vawi khatna atan Serchhip-a TrueNat Laboratory-ah COVID-19 hri kai hi hmuh leh niin a tuk September 7, 2020-ah Rapid Antigen Test hmangin hri kai hi hmuh leh a ni bawk a, hemi hnu hian hri kai hmuh hi awm chho rengin January 20, 2021 thlengin hri kai hmuhchhuah an awm hnuah January 21, 2021-ah hri kai hmuhchhuah hi a tawp lailawk rih a ni.

Nikum January 20-a hri kai hmuhchhuah a nih atang ni 76 hnu, April 8, 2021 khan COVID-19 hri kai hi hmuhchhuah leh a ni a, hemi atang hian hri leng pawhin hluar lam pan zelin nikum September, October, November leh December thla te bakah kumin ah January leh February thla leh March thla ah pawh ni 16 thlengin hri kai hmuhchhuah hi nitin an awm ziah a. Mizoram District hrang hrang zingah pawh Serchhip District chu hri kai enkawllai tamna ber nih chang te awmin April thla vel atangin hri kai hmuhchhuah hi a tlahniam ve hret hret a, tunah chuan hri kai enkawllai an awm ta rih lo a ni. Serchhip CMO-a thawktute chuan tunah hian COVID-19 hri kai enkawllai awm lo mah se Mizoram-ah hri kai an la tam avangin hri laka invenna hrang hrangte chu ngaih pawimawh ala tul thu an sawi a ni.

Comments

Popular posts from this blog

Bialtu MLA in Laptop pe