Mizoram-a Oil leh Gas zawnchhuah kawnga hmalakna leh hmachhawp mek thlirhona neih a ni

Mizoram-a leihnuai hausakna – Oil leh Gas zawnchhuah kawnga hma an lak tawhna te leh hmachhawpte sawihona atan niminpiah khan Aizawl-ah Joint Meeting neih a ni a, Commerce & Industries Minister Dr. R Lalthangliana chuan Mizorama Oil leh Gas zawnchhuah hna ONGC leh OIL in an kalpui chu a muang nia a hriat thu a sawi.

Aijal Club Conference Hall-a he Joint Meeting-ah hian Ministry of Petroleum & Natural Gas hnuaia Directorate General of Hydrocarbons (DGM), Oil & Natural Gas Commission (ONGC) leh Oil India Limited (OIL) aiawhte bakah Mizoram sawrkar atangin Geology & Mining; Forests, Environment & Climate Change; Land Revenue & Settlement Department leh PWD hotute an tel a. Commerce & Industries Minister Dr. R. Lalthangliana chuan kum 20 chhunga Mizoram-a Oil leh Gas zawnchhuah hna ONGC leh OIL in an kalpui chu a muang nia a hriat thu sawiin, chak zawka hemi kawnga hma an lak a pawimawh thu leh hemi kawnga tul leh pawimawh Mizoram Sawrkarin a tih tur tur chu chak taka bawhzui mek anih thu a sawi. Minister hian Oil leh Gas zawnchhuah kawnga Mininum Work Programme hnuaia ONGC in hmun thum-ah leh OIL in hmun nga-a leiverh hna (exploratory well) thawka hma an lakna chu tlem a tih sawiin, hei aia hmun tam zawka leiverh hna hi kalpui turin kawng dap nise tiin a ngen a. ONGC in hmun thum a leiverh an tumna, Hortoki bul Drilling Site chu Chief Minister hmalakna in a kawng pawhna tur sial mek a nih thu leh OIL in hmun ngana tura, Pangzawl lamah lei an verhna tur pawh bawhzui chak turin a ngen a. Hei bakah Oil leh Gas zawnchhuahna hna thawktu Oil Company te license tawp tawh chu kum 4 dang atan pawhsei a tul hle tiin DGM lamin hei hi ngaipawimawh se a duh thu a sawi a ni.

He Joint Meeting-ah hian ONGC leh OIL aiawhte leh mithiamte chuan Mizoram-a Oil leh Gas zawnchhuah kawnga hma an lo lak tawhna te sawi zauin tlang ram-a Oil Exploration hna hautak bik dan te an tarlang a, Meeting chuan Mizoram-a Oil leh Gas zawnchhuah hna chak zawka kalpui anih theih nan leihnuai chanchin, Seismic Data Agency 2 in an lakkhawm leh an zirchian te chu inhmantawm thei tura hmalak nise tiin an rawt a. Mizoram Sawrkar aiawhte nen a khat tawkin Oil Company te hian Meeting nei thin se tiin an rawt bawk a ni.

Mizoram-a Oil leh Gas zawnchhuah hna hi hlawm lian pathum ah thenin hmalak a ni a. Block No. AA-ONN-2001/2 hi Mizoram hmar lam niin Square km 2680 a huam a. He Block-ah hian ONGC in hna thawkin an Minimum Work Programme hnuaia hmun 3-a leiverh hna zinga hmun hnih – Zanlawn leh Meidum chu an thawk zo tawh a. Zanlawn-ah engmah hmu lovin Meidum-ah erawh Gas an hmu a, mahse hei hi ONGC lam chuan tam tawkah an ngaih loh avangin an Techno-Feasibility a chhiat thu an sawi a. Hortoki Drilling Site-ah leiverh an la hmabak a ni.

Block dang leh chu Mizoram laili bawr niin hei hi Block No. AA-ONN-2004/1 tih niin Square km 3213 a huam a. He Block-ah hian OIL in hna thawkin hmun 5-a lei verh hna zinga pali – Maubuang, Keifang, Thenzawl leh Phulmawi chu zo tawhin heng Drilling Site hi Unsuccessful Drilling tiin engmah an hmuh loh thu an sawi a. Pangzawl lama Drilling Site hi an la hmabak a ni. Pangzawl Drilling Site hi chhim lama awm anih avangin leh Oil tamna Arakan Basin a hnaih avangin beiseina sang tak an neih thu an sawi a. Helai hmuna lei an verh hnua chanchin an lakkhawm leh an zirchian atangin Mizoram chhim lama Oil leh Gas zawnchhuah hna chu engemaw chen a hril thei ang tiin an ngaihdan an sawi.

Block dang leh chu Mizoram chhim lamah niin Block No. AA-ONN-2004/2 tia hming vuah a ni a, Square km 3619 huamin he Block a Oil zawnchhuah hna hi Reliance Energy Ltd. pek an ni a, hmalakna engmah an neih tak loh avangin an hna hi cancel tawh a ni.