Chief Minister's Award hlan

School Education Department buatsaihin nimin khan zirlai tithate hnenah ‘Chief Minister's Award’ hlanna neih a ni a, Chief Minister Zoramthanga chuan a hmanpui a ni.

Chief Minister's Award hi High School Leaving Certificate (HSLC) leh Higher Secondary School Leaving Certificate (HSSLC) Exam-a Topper te hnena hlan thin niin kumin hian HSLC-a Tpper mi pahnih te leh HSSLC-a Topper mi pathum te hnenah Citation leh pawisafai Rs. 50,000 theuh hlan an ni a. Chief Minister's Award hi kum 2014 atang khan bultanin tum 10 sem a ni tawh a ni.

Chief Minister's Award hlanna hun School Education Department Conference Hall-a nimin a neih ah hian Chief Minister Zoramthanga chuan HSLC leh HSSLC tithate hnenah CM Award pek a ni leh thei chu lawmawm a tih thu sawiin, zirlai tam tak zinga a ber nih chu thil ropui tak a nih thu leh, tumruhna nasa tak nen chuan Mizoram chauh nilo, India rampum huapah pawh a ber an la nih theih thu a sawi a. Hmanlai hun leh tunlai hun inkar a hlat tawh thu Chief Minister chuan sawiin, khawtlang nunphung inthlauh tawh zia atangin education in kan khawtlang nun a chawisan dan lang chiang hle a ni, a ti a. Lehkhathiamna chuan eizawnna tha - sawrkar emaw private hnuaiah emaw, sumdawnna emaw mahni kutkawih eizawnna a ni emaw nei thei turin thiamna min pe a. Eizawnna piah lamah mihring hman tlak, ngaihtuah a chang-kang a thlen theih thu a sawi a. Amaherawhchu, chung zawng zawng chu zu leh ruihhlo laka kan fihlim loh chuan kan hriselna tihchhiata awmin, kan nih tur ang ni theilo dinhmunah kan awm thei thung dawn a ni, a ti.

He hunah hian School Education Minister Lalchhandama Ralte pawhin COVID-19 hri lengin kum hnih chhung kawng hran hranga harsatna a thlen zingah zirna chu a langsar ber zing ami a nih thu sawiin, Zirna hi hmun sang kan chantir chuan kalkawng dik kan ram hian kan zawh dawn a ni, a ti bawk.

Comments

Popular posts from this blog