Hri leng avanga State pawn atanga rawn haw te puala eizawnna Training Serchhip-ah zawhfel a ni

Mizoram atanga State pawna hnathawka awm, COVID-19 hri leng avanga an hnathawh chhunzawm thei lova rawn haw te puala eizawnna kawng siamna tura inzirtirna Serchhip District tana buatsaih chu nimin khan zawhfel niin he training-a tel mi 71 te chu an hnathawhna atana hmanraw pawimawh leh Certificate hlan an ni.


Mizoram Youth Commission (MYC), Deputy Commissioner Serchhip leh SIRD&PR tangkawp ten an buatsaih Livelihood Generation for Returned Migrant Workers due to COVID-19 hi May 4, 2022 khan Serchhip-ah neih tan niin Cement Mistiri, Vawk vulh leh ei siam-ah te training hi neih a ni a, he Training kharna inkhawm hi nimin khan Serchhip Tarpi Tlang-a Serchhip District Panchayat Resource Centre-ah District Bawrhsap Nazuk Kumar IAS hovin neih a ni.


Nimin-a Training kharna hunah hian Bawrhsap Nazuk Kumar chuan training chhuakte chu a lawmpui thu hrilhin, training buatsaih anih theih nana bultumtu MYC leh helai-a lo buaipuitu SIRD & PR chungah lawmthu a sawi a. “Kan thil zirte kha ram leh khawtlang in kan mamawh tak tak thilte an nih avangin in kal zelna turah hmabak a eng tha hle niin kan ngai a, taima taka bei chhunzawm turin kan ngen che u a, khang in thil thiam takte kha a taka in thawhchhuah pui chuan Mizoram in hma a sawnna kawngah tha thawhtu pawimawh tak in ni dawn tihna a ni,” tiin he Training a tel te chu a chah a. Mahnia bultanna nei remchang lote pawhin sawrkarin bultantute tana Scheme hrang hrang PMEGP leh Loan Scheme dang a neih te ngaihven tur leh hmasawnpui ngei tum turin a chah a. “Degree hi thil pawimawh ber a ni lova thiamna, engemaw siamchhuak emaw thar chhuak thei khawp thiamna hi a pawimawh zawk chu a ni,” tiin he training-a tel te chu an thiamna te tipung zel tur leh thiamna pawimawhzia hre turin a chah a, hemi hnu hian Training chhuak te hi Certificate leh an hnathawhna atana hmanraw pawimawh te a hlan nghal a ni.

Nimin-a Training kharna hun hi Serchhip Addl. DC Lalmuansanga Ralte chuan kaihruaiin Training an kalpui dan tlangpui hi Trade hrang hranga zirtirtute aiawhin Vanlalhruaia, Head Faculty, SIRD & PR; Dr. H. Vanlalrawna VO, District Vety Hospital leh Lalhmangaihzuali, M.Sc, Food & Nutrition ten an pe a, Zirchhuakte aiawh hian F. Lalrinawma, Khawtetlang chuan thusawina hun a nei bawk.

Tun tumah hian Cement Mistiri-ah mi 33, Piggery-ah 20 leh Food Processing-ah mi 18 te training in an Training chhung hian nitin Rs. 250/- zel pek an ni bawk a ni.

Comments

Popular posts from this blog

Bialtu MLA in Laptop pe