Mizoram Governor in NABARD hotute Mizoram-a an hmalakna a sawipui

Mizoram Governor Hari Babu Kambhampati chuan NABARD Official te chu nimin khan Raj Bhavan-ah kawmin Mizoram chhunga an hmalakna hrang hrang a sawipui.

Nimin-a NABARD hotute a kawmna ah hian Governor Hari Babu Kambhampati chuan NABARD in Mizoram hmasawnna tura hmalakna pawimawh tak tak te thawhna turin sum an puktir thin chu lawmawm a tih thu a sawi a. Sawrkar leh mimal anga thawhpui tam tak NABARD in a nei tih a hriat thu te sawiin, Mizoram hmasawnna atan thawktu tangkai tak ni chhunzawm turin NABARD hnathawktute chu a sawm a ni. Governor chuan Agriculture and Allied Sector huanga hmalakna te chu nasa zawk tanlak pui an ngai nia a hriat thu a sawi a, a bikin Ar vulhtute leh Sangha vulhtute tanpui kawngah NABARD chu nasa zawka luangchhuak turin a sawm a ni.

He inkawmna ah hian NABARD Mizoram-a General Manager KVSSLV Prasada Rao chuan NABARD in Mizoram chhunga hma an lo lak thin dan te leh thil pawimawh nia a hriat te Governor hnenah hian a thlen a. NABARD chuan Mizoram sawrkar hmalakna te Rural Infrastructure Development Fund (RIDF) kaltlangin tanpuina sum pe/puktir thin tih a sawi a. RIDF hnuaiah hian thingtlang hmun hrang hrangah a mamawhtute hman atan Kudam, bungrua leh thildang dahkhawlna In te, kuthnathawktute eizawnna huanga thil tangkai siamna leh pawimawh dang siam a ni thin tih sawiin, heng bakah hian mimal leh Bank te pawh an hmalakna atan sum an puktir thin tih a sawi bawk.

NABARD hotuten report an pek dan chuan kum 2021-2022 chhungin Mizoram Rural Banks leh Mizoram Coop. Apex Bank te hnenah Refinancing angin cheng vbc. 115 puktir an ni a. Hemi hun chhungah tho hian State Sawrkar hnenah RIDF hnuaiah cheng vbc. 311 puktir an ni tawh a; sawrkar a puktir tawh zat chu cheng vbc. 1907 a ni mek a. Tunah hian he sum hmang hian project 495 thawh mek niin cheng vbc. 440 la sanction loh a awm mek a. He sum la pekchhuahloh sanction nan hian project thenkhatte chak zawka kalpui a ngai tih tarlan a ni.