Mizoram-ah Wine Rules nei turin hma la mek; AMFU in harsatna sutkian sak turin sawrkar an ngen

Excise and Narcotics Minister Dr. K. Beichhua chuan ‘Wine Rules’ nei thei tura hma an lak mek thu a sawi a. Hetihlai hian Wine Rules chu pawmpui (vet) turin Law & Judicial Department-ah a thang mek nia thudawn a ni.

Thuthar thehdarhtute zawhna chhangin Excise Minister Dr. K. Beichhua chuan Wine Rules nei thei tura hma an lak mek thu leh an hmalakna chu a hlawhtling turah an ngai tih a sawi a ni. Wine Rules chungchangah vek hian Mizoram sawrkara Law & Judicial Department Secretary Helen Dawngliani MJS pawhin zawhna chhangin Vetting turin an kutah a awm mek tih a sawi a, anni lamin an tih turte an tih zawh hunah an recommend-te nen, a Department neitu lamah a kal leh tur thu a sawi.

Hetihlai hian Zu khapna dan, Mizoram Liquor Prohibition Act 2019 hnuaiah Zu hrim hrim khap bur a nih avang leh kumin March 25-a Council of Ministers thukhawmin Mizoram Liquor (Prohibition) Rules, 2022 a pawm takah pawh Wine chungchang telh a nih loh avangin dan dinglaiah chuan Grape Wine siam/zawrh khap a ni a. Hnahlan leh Champhai-a Grape chingtute chuan tunhnai khan Wine an siamchhuah theihna tura dan siamsak an nih theihna turin eptu party - Congress, ZPM, Mizoram BJP leh PC party-te hnen atangin Dan hnuaia wine an siamchhuah an dodal loh thu tarlanna, ‘No Objection Certificate’ lehkha an lo la tawh a, chungte chu Excise Minister hnenah an lo thehlut tawh a, Chief Minister hnenah a rang thei ang bera Wine Rules siamsak tura ngenna an lo thlen tawh bawk a ni.

All Mizoram Farmers Union (AMFU) pawhin Zirtawpni kalta khan kum 2022-2026 atana Executive Meeting hmasa ber chu Aizawl-a an Office-ah neiin Grape chingtute harsatna chu a rang thei ang bera sutkiansak turin sawrkar an ngen tih an sawi a, Champhai Winery-a Fermentation Tank 25 lai chu hralhchhuah theih loha a awm mek laiin Grape rah lawh a hun leh tawh dawn a, he an harsatna tawh mek hi sutkian sak vak turin sawrkar chu an ngen nawn a ni. AMFU chuan sawrkarin lo neitute thleng phak SEDP a kalpui chu tha an tih thu pawh sawiin, an member ten taima leh rinawm tak, dik taka lo dawngsawng a, dinchhuahpui nana hmang ngei turin an chah a. Mizorama loneituten an tharchhuah eng pawh dinchhuah pui nana an hman ve theih nan, an harsatnate sukiang turin sawrkarah thlen sak zel relin, Mizorama tharchhuah thlaite a awm hun lai chuan State pawn atanga lalut lo turin sawrkar ngen bawk.

Comments

Popular posts from this blog