Mann Ki Baat-ah Prime Minister in Chite lui thenfai leh Mizoram-a Plastic Road siam te tarlang

Prime Minister Narendra Modi chuan nimin khan ram mipuite hnenah Mann Ki Baat kaltlangin thuchah a sawi leh a, hetah hian Mizoram khawpui, Aizawl-a Chite lui then thianghlim a nih dan leh bawlhhlawh Plastic leh Polythene hmanga Mizoram chhunga Plastic Road siamchhuah a nih thu te a tarlang.

Prime Minister in ram mipuite hnena thla tin-a thu a sawina hun, Mann Ki Baat vawi 90-na hi nimin khan ramchhunga All India Radio leh Doordarshan Kendra-ah te tihchhuah leh a ni a, he hunah hian Prme Minister chuan bawlhhlawh then thianghlimna beihpui thlakna, Waste to Wealth kaltlangin hmalakna hlawhtling takte thlir thin a ni tih sawin, hemi hmalakna atana entirna pakhat chu Mizoram khawpui Aizawl a nih thu a sawi a. Aizawl-ah hian lui mawi tak pakhat Chite lui a awm thu Prime Minister chuan sawiin, hun rei tak atang tawh bawlhhlawh paih khawm anih avangin bawlhhlawh paihna hmun ang maia en anih hial tawh thu leh hun reilote atang khan he lui hi chhanchhuah hna thawk tura hmalakna neih a ni tih a sawi a, “Chite Lui ti thianghlim tura hmalakna atan hian a hmuna Agency te, Social Worker te leh mipuite chuan inlungrualin ‘Save Chite Lui Action Plan’ an kalpui ta a, Lui thenfai hna bultanin Waste to Wealth creation chu a takin an kalpui ta a ni,” tiin Chite lui-a Plastic rawn langchhuak te hmangin Mizoram chhunga thingtlang khaw pakhatah a vawikhatna atan Plastic Road siamchhuah a nih thu sawiin, “Faina leh hmasawnna an kalkawp tir a ni,” a ti.

Save Chite Lui Coordination Committee (SCLCC) te chuan Chite Lui-a bawlhhlawh lut te zingah hian zaa 80 vel zet chu Plastic atanga thil siam hman hnu a ni tih sawiin, SCLCC hma-lakna in vawi engemaw zat tihfai a nih tawh thu leh heng Plastic hman hlui te hi chharkhawm ni fo tawh mah se a thehthang zuina tur leh thehthang zui dan turah harsatna an lo tawh tawh thu an sawi a ni.

Hetihlai hian sawrkar laipui-a Ministry of Environment, Forest & Climate Change dan siam, Plastic Waste Management Rules, 2016 dung zuiin Chite lui in a luan tlang Veng hrang hrang zinga mi, Bethlehem Vengthlang Branch YMA te chu Chite Lui-a Plastic hnawmhnawk te man nei-a hralh tura chhar duh zawnpui turin ngen an ni a, hei hi leikhawmin kawngpui siam nan hman a ni ta a ni.