Mizo thalaite India ram-a hna lak sang leh exam-a an tling thei ta meuh lo hi a veiawm - MYC Chairman

Mizoram Youth Commission (MYC) Chairman Dr. Vanlaltanpuia chuan Mizo thalaite India rama hna lak sang leh exam-ah te an tling thei ta meuh lo chu veiawm a tih thu sawiin, MYC hnuaia IAS Full Sponsorship leh Mega Hybrid IAS Programme kalpui nan Sawrkarin budget-ah cheng vbc. 2.6 lai a dah a nih thu a sawi.

Mizoram-a MYC Coaching Centre pangana ni tur Champhai Nursing School Building-a MYC Coaching Centre hawnna nimin a neih ah he thu hi sawiin MYC Chairman Dr. Vanlaltanpuia chuan Mizo hnam chhanna tura pawimawh tak zirna tihhmasawnna tur atan MYC Coaching Centre hawn a nih thu tarlangin, MYC hnuaia IAS Full Sponsorship leh Mega Hybrid IAS Programme kalpui nan Sawrkarin budget-ah cheng vbc. 2.6 lai a dah avangin Planning Department changtu Chief Minister chungah lawmthu a sawi a. MYC Coaching Centre-te chu remchan dan leh intawm theih dan turte chhutin hleibik nei lova din thin a ni tih a sawi a. Mizo thalaite India rama hna lak sang leh exam-ah te an tling thei ta meuh lo chu veiawm a tih thu sawiin, kan dinhmunte thlirin MYC chuan Super 40 Program kalpui tura hun a hawn mek thu leh India rama Academy tha ber ber 3; Vajiram and Ravi, Vision IAS leh ALS te biakfela thawhhona neih a nih thu a sawi a, June ni 24 a exam turah mi 500 chuang an inziaklut chu lawmawm tiin, tun maiah hlawhtlinna hmu lo mah ila a hlawhtlin ngei theih nan tan kan lak tlan a tul a ni, a ti a. Heng bakah hian Mega Hybrid IAS Programme hnuaiah mi 100 tan Coaching Centre 4-ah MoU sign a nih tawh thu a tarlang bawk.

Mega Hybrid IAS programme hnuaiah MYC hi ALS Coaching Academy-te nen thawkho in Aizawl-ah mi 60, Lunglei-ah 20 leh Kolasib leh Siaha Centre-ah 10 ve ve, an vaiin UPSC Exam beih tum mi 100 te Coaching a pe mek a, Champhaia Coaching Centre-ah chuan tun Session-ah Coaching hi kalpui a ni ve dawn rih lo a ni.

MYC Coaching Centre Champhai atan hian Nursing School Building chhawng chung bera Room 3 hman lailawk a ni dawn a, Coordinator pakhat lak tawh a ni a, Faculty 3; General Studies, English leh Mathematics zirtirtu lakna tur tender chhuah thuai tum niin, lak fel a nih hnuah Coaching Class kalpui tum a ni.

Comments

Popular posts from this blog

Bialtu MLA in Laptop pe