YMA Football S/F khelh zawh a ni

Serchhip Sports Complex-a khelh F. Zothanmawia Memorial Football Tournament-ah nimin khan Semi Final khelh zawh niin Chhekhnai Branch YMA leh Vengchung Branch YMA ten an khingpui te hnehin Final an lut a ni.

Serchhip Hmar Veng Football Club buatsaih Serchhip Town chhunga YMA Branch te Football-a inelna, F. Zothanmawia Memorial Football Tournament hi nimin khan Semi Final khelh niin inkhel hmasa zawkah Chhekhnai Branch YMA leh Serchhip Chhim Veng Branch YMA te an inhmachhawn a, hun chanve hmalama goal lut a awm loh hnuah Chhekhnai Branch YMA hian Lalthuthluanga goal khung hmangin minute 52-na ah hma an hruai a, minute 7 hnuah B. Lallawmawma chuan an goal hnihna khung zuiin an dinhmun a tha viau a, amaherawh chu Chhim Veng Branch YMA tan Rodinsanga chuan minute 69-na ah an si phurh sut thenin minute 72-na ah Lalfakawma chuan goal a khung leh a, hun tawp thlengin 2-2 in an inhnehtawk a ni.

Hun pangngaia chak zawk an awm loh avangin Extra-Time khelh zui a ni a, Chhim Veng Branch tan Rodinsanga bawkin minute 100-na ah goal rawn khungin hma an hruai a, minute 113-na ah Chhekhnai Branch YMA lam tan Lalrinzuala chuan an si phurh a rawn sut ve leh a, hun tawp dawn minute 119-ah B. Lallawmawma chuan Chhekhnai Branch YMA chakna goal rawn khungin 4-3 in hnehna an chang a, Final an lut ta a ni.

Nimin a Semi Final inkhel hnuhnung zawkah Vengchung Branch YMA chuan si hnih faia P&E Veng Branch YMA hnehin Final an lut ve bawk a, he inkhel ah hian Vengchung Branch YMA tan minute 43-na ah Jerry Laldikkima chuan goal hmahruai khungin Second half minute 63-na ah Rosangzuala chuan an goal hnihna hi a khung ve leh bawk a, P&E Veng Branch YMA lamin an si phurh hi an sut theih tak loh avangin 2-0 in Vengchung Branch YMA te hi an chak ta a ni.

Vawiin-ah Final khelh a ni dawn :

June 13, 2022 atanga khelh tan F. Zothanmawia Memorial Football Tournament hi Vawiin hian Final khelha zawhfel a ni dawn a, he Tournament kharna inkhawm hi Vawiin chhun dar 12:30-ah Sports Complex-ah neiin hemi hnu hian Chhekhnai Branch YMA leh Vengchung Branch YMA te hian Final an khel chhunzawm nghal dawn a, Final khel tur Branch pahnih te hi tun tum Tournament-a hneh loh la nei lo ve ve leh players nei tha ber pawl an nih ve ve avangin inkhel hmuhnawm tak en tur a awm ngei a beiseiawm a ni.