Kumin a Serchhip Police te Heroin No. 4 man gram 1384.41 halralna hun hman a ni

Naktuk June 26-a International Day Against Drug Abuse and Illicit Trafficking lo thleng tur denchhenin District Level Drug Disposal Committee in ruahmanna a siam angin Serchhip District Police ten tunhnaia Heroin No. 4 an man gram 1384.41 zet chu nimin khan Serchhip Sailiamkawn-a District Hospital Incinerator hmunah halral a ni.

Heng ruihhlo man sa halral hmaa inkhawm tawi neih ah Serchhip District Bawrhsap mawhphurhna la mektu Lalmuansanga Ralte chuan tunhma lamin kan khawtlang ah hetiang ruihhlo hi tlem te te man a ni thin tih sawiin, tunhnaia tam tham tak man a ni ta fo chu thawktute thawhrimna piah lamah kan ramah hetiang ruihhlo a tam tawh zia tilangtu a nih thu a sawi a. Ruihhlo tawlhruk man chu thil harsa a nih thu leh lirthei lo enfiah zel tur pawhin thawktu indaihlohna avang te leh thildang avanga harsatna a awm theih thu sawiin, chutih kara hetiang zat man a ni chu a lawmawm rualin man loh chu a tam zawk a nih theih thu a sawi a. Hei vang hian ruihhlo dona kawngah hian kan tanrual a pawimawh thu a sawi a, sawrkar tha ti chak turin tlawmngai pawl leh mipuite thawhpuina chu sawrkar in a mamawh em em reng a ni tih a sawi.

Serchhip Addl. DC chuan ruihhlo dona kawnga hmalakna chu Mizote tan indona a ni tih sawiin, hnam ang pawha kan tanrual a tul thu a sawi a, tuna chhuan lo la awm leh turte hi ruihhlo avanga hman tlakloh a an awm a nih chuan kan Hnam hma hun a thim em em tih sawiin, hemi kawngah hian Mizo mipa ten kan tih tur leh tih loh tur kan hriat a pawimawh thu a sawi bawk a ni.

Serchhip SDPO Kaste Romalsawma kaihhruai he hunah hian Serchhip Addl. SP Saidingliana Sailo chuan International Day Against Drug Abuse and Illicit Trafficking chu kum 1997 atanga hman a ni tih sawiin, he ni denchhena Heroin No. 4 hetiang zat halral tur a awm chu a lawmawm viau rualin ruihhlo in min luhchilh nasat tawh zia tilangtu a ni tih kan hriat a pawimawh thu a sawi a, ruihhlo hian tun dinhmunah kan chhungkua min la luhchilh lo a nih pawhin khawtlang nghawngin sualna a pung a, min nghawng tel dawn tho tho a ni, a ti a. Serchhip District chu Crime Rate san lohna a nih thin laiin kumin ah thubuai 53 zet ziahluh a ni tawh tih pawh sawiin, a chhe zawngin kan thang tih a sawi bawk.

Nimin-a ruihhlo halral tak te hi a vaiin gram 1384.41-a rit niin Forensic Science Laboratory-a enfiah tawh te an ni a, kumin February leh March thla a man te niin heng zingah hian April 22-a Tuichang leh Keitum inkara gram 1278 an man leh April 21-a Helipad bula gram 92.09 an man te a tel a ni.

Ruihhlo halralna hunah hian Serchhip Police, Sub-Hqrs. Anti Drug Squad (SADS) leh MHIP Sub-Hqrs. hruaitute bakah tualchhung thuthar thehdarhtute an tel a ni.