Kawng laihin environment a tihchhiat titawp turin ngen

Youth for Environment Justice Mizoram (YEJM) bakah Lunglei, Serchhip, Hnahthial leh Saikhawpui Thalai Pawl te chuan, NHIDCL kawng laihin environment a tihchhiat nasat lutuk tihtawp a nih theih nan hmala tura ngenna chu nimin khan Chief Minister hnenah aan thehlut.

Nimin a lehkha an thehluh ah hian NHIDCL in India Environment dan leh hrai pakhatmah an zawm lo tih tarlangin, Environmental Impact Assessment (EIA) an tihna awmchhun, NH-54 (widening) Aizawl to Tuipang ah pawh EIA Report leh Plan an zawm hmuh tur a awm lo tih an tarlang a, “Leilung fate duhdan ngaih pawimawhna chhete mah nei loin, rapthlak takin kan environment an nghaisa/suamsam a. Mipui thinurin kan kuta dan kenkawh hna kan thawh hma ngeia hma i lak a tul a ni,” an ti.

NHIDCL te hmalakna heng; NH-06; Seling to Zokhawthar, NH-54; Aizawl to Tuipang, NH-302; Lunglei to Tlabung, NH-102B; Keifang - Manipur te an endik atangin, kan lui kawr leh lui te (seasonal leh perennial river) a chhilh chu 99.9% a ni tih huai taka an sawi ngam thu te an tarlang a, “Environment a chhiat chuan Mizoram leh hnam hi a ral ang. Mizoram hi tlang ram mawi tak ni mahsela, a leilung leh Ecosystem der dep em em a ni,” an ti bawk.