Super IAS programme kalpui dawn; Written exam hmachhawn tur mi 575 an awm

Mizoram Youth Commission (MYC) Chairman, Dr. Vanlaltanpuia MLA chuan, kumin atan Super IAS 40 programme ruahman a ni tih sawiin, Super IAS Full Sponsorship hnuaia kalte chuan Prelims vawi hnih (2) an hmachhawn hma chuan Central leh State hnuaiah hna exam phalsak an ni dawn lo tih a sawi.

Nimin khan Aizawl-a MYC Conference Hall-ah thuthar thehdarhtute kawmin, MYC Chairman chuan hemi chungchang hi a sawi a, Mizote tana tha ber ni a an hriat Vajiram & Ravi, Vision IAS leh ALS-ah te Mizo thalaite dah an rilruk tih sawiin, engtikah emaw chuan he hmalakna hian hlawhtlinni hmel hmuin, kan thalaite zingah IAS ngei pawh neih thuai an beisei takzet tih a sawi a ni.

MYC Chairman chuan Super IAS programme kalpui turah uluk leh zual zawkin ruahmanna siam a nih thu te, chumi atan chuan Screening Test chu Exam Centre pawh hmun 5, PUC, JB College, Lunglei, Govt. College, Siaha, Govt. Kolasib College leh Mizoram pawn a awm exam duhte tan Delhi Centre buatsaih a nih thu te a sawi a ni.

MYC Chairman sawi danin, Super IAS programme ah Written Exam nei tur mi 575 an awm a, Vawiin hian exam hmachhawnin, Written Result June ni 27 ah tihchhuah a ni anga, Written exam-a 50% hmu tling chin atangin Merit list-in interview tur koh an ni anga, 50% hmu tling mi 40 an tlin loh pawhin a tling chhun chhunte lak an ni anga. June ni 28 leh 29-ah Personal Interview neiin, July ni 1-ah Interview result tihchhuah tum a ni a. July ni 10-ah Coaching Centre lut hman tur a ruahman a ni. Interview neihna hmunah Panel of Chairman atan Mizoram Central Service-a awm Official te hman an ni ang a, Panel Member-ah Vision IAS lam an ni ang. 

Super IAS programme-a thlanchhuahte chu Vision IAS, ALS leh Vajiram & Ravi IAS Coaching Centre-ah te dah an ni ang a, nakum 2023 Prelim Exam dawn thleng an awm ang. Zirlai pakhat zelah Coaching kalna senso Rs. 1,40,000-1,80,000 inkar a ni anga, hetah hian Hostel Fee chhut tel a la ni lo.

MYC Chairman chuan tun ang reng a kan kal chuan kum reilote chho ah chuan Central Service kan neih chhoh zut zut theih a rinawm thu pawh sawiin, hetihlai hian tun dinhmunah chuan Mizo thalaiten All India Service kan cho tawk lo nia a ngaih thu a sawi a, chu chu Written Exam hmachhawn tur mi 575 chauh awmin a tichiang nia a ngaih thu a sawi. “Kan comfort zone-ah kan inkhung a, chuta tanga kan chhuah chu a ngai,” tiin, “Tuna kan hmalakna ah hlawhtlinna kan nghakhlel a, hlawhtlinna a awm thei lo a nih chuan a mawhphurtu tur chu keimah ka ni ang, min rawn kawk tawh mai a niang chu,” a ti bawk.