JJM hnuaiah Mizoram-a Tui connection 83,264 pe tawh

India rama chhungtinin mahni In-a tui herh haw an hman theih nana Sawrkar laipuiin a duan, Jal Jeevan Mission (JJM) chu Mizoram-ah chhungkaw 83,264 pek tawh niin zaa 63% pek tawh an ni a, nakum Deceber thla-a pek zawh hman vek tum a ni.

PHE Department-a Superintending Engineer Lalropuia sawi danin Jal Jeevan Mission hi Mizoram-a thingtlang khua 692 leh mihring chenna hmun dang khaw per 30 dang huam vek thei tura ruahman a ni a, a vaiin khaw 722 tuam chhuakin heng khua ah hian chhungkaw 1,33,132 ten Tui Connection an dawng vek dawn a ni.

Jal Jeevan Mission chuan Rural chauh huamin Mizoram chhunga Notified Town 23 te a huam ve lo tih PHE SE chuan sawiin, Jal Jeevan Mission India ram pumpuia kum 2024-a zawh tur tih chu Mizoram-ah chuan kum 2023 December thla ah a zawh theih dawn tih a sawi a. Jal Jeevan Mission hi kum 2019 atangin Mizoram-ah a takin hnathawh tan a ni a, Mizoram chhunga khaw 722-a chhungkaw 1,33,132 zingah 83,264 pek tawh niin 49,868 pek tur an la awm a, Tui Connection dawng tawh hi za zela 63% niin khaw 315-ah pek a ni tawh a ni.

Jal Jeevan Mission-ah hian Central sawrkar in sum mamawh zaa 90 tumin State Sawrkar in zaa 10 an tum thung a, Mizoram-a he Mission kalpuina atan hian Central Sawrkarin cheng vbc. 1376.25 a tum dawn a, Mizoram Sawrkar in cheng vbc. 152.92 tumin, a vaiin JJM atan hian cheng vbc. 1475.99 ruahman a ni.

PHE Department-a SE Lalropuia chuan Mizoram chhungah In tinin tui herh haw an dawn theih nan hmanrua tha thei ang ber hman a ni tih sawiin, chhung tinin 5% an thawh ve tura tih chu Mizoram-ah chuan pawisa zawnga pe lovin chhung tinin an mahni inchhunga pipe thlun zawmna tur te laiin tan an lo la ve thin tih a sawi bawk.