India-ah Sipai lak dan thar ruahman a ni

Sawrkar Laipui chuan tunhnaia khan sipai lak dan Scheme thar, Agnipath Scheme chu a ruahman thar.

Agnipath Scheme kaltlanga sipai lak te chu Agniveer tih an ni dawn a, tun atanga Sipai lak reng reng (khawmual, thlawhna leh lawng sipai) chu he Scheme zulzuia lak a ni tawh dawn a, he Scheme hi kumin atanga hman tan nghal tura ruahman a ni. Agniveer te hi kum 4 chhung atan lak an ni dawn a, an lak zat atanga za zelah 25 chu dahngheh tur a ni dawn, a bak zawng chu an term kum 4 a tawp hunah sumfai nen an chhuak ang.

Agnipath Scheme hian Service pathum – Army, Navy leh Airforce ten sipai an lak thin chu in angin a huam vek dawn a, Agniveer diltu kum bithliah chu kum 17 leh a chanve leh kum 23 inkar niin dilna hi Centralized Oline System a kalpui tur a nih dawn bakah Technical zirna In, ITI ang te leh National Skills Qualifications Framework kalpuina Institute-ah te a bika Specialized Rally leh Campus Interview te katlang pawhin lak an ni dawn a ni. Agniveer hi All India All Class angin lak an ni dawn a, a awmzia chu tunhmaa Regiment zawnga hnam thenkhatte lak thin chu a tawp dawn a, ang khat vekin lak an ni tawh dawn a ni.

Agniveer te hian thlatin hlawhbi bakah an Service luhna in a huam tel Risk and Hardship Allowance te an la anga. A kum khatna ah thlatin Rs. 30,000; a kum hnihna ah thlatin Rs. 33,000; a kum thumna ah thlatin Rs. 36,500 leh a kum lina ah thlatin Rs. 40,000 an hlawh dawn a. An hlawh atangin a kumkhatna ah thla tin Rs. 9000; a kum hnihna ah thla tin Rs. 9900; a kum thumna ah thla tin Rs. 10,950 leh a kum lina ah thla tin Rs. 12,000 Corpus Fund-ah dahsak an ni ang, Sawrkar in thlatin an dah zat ang Corpus Fund-ah a do let ve ang a. He Corpus Fund tlingkhawm a pung nena chhut ‘Seva Nidhi Package’ cheng nuai 11.74 hu tlingkhawm chu an chhuah hunah pek an ni ang. Kum 4 an thawh chhungin Life Insurance cheng nuai 48 man, anmahni chawi ngai lovin Sawrkarin a lak sak dawn a ni.