Hripui karah dam khawchhuah kan tum ber; Central-in pawisa min pe kim se harsatna a awm lo ang - MNF President

MNF President Zoramthanga chuan, hripui vangin hun harsa tak karah sawrkar chu dam khawchhuah tumin a kal tih sawiin, “Budget-a ruahman angin pawisa hmuh kim ni se, harsatna engmah a awm lo ang,” a ti a. Nakum-a inthlanna lo awm turah pawh Pathian leh mipuite zarah sawrkarna an lak leh ngei a rin thu a sawi bawk.

Nimin-a Aizawl Vanapa Hall-a MNF Office Bearer's Meeting neih a hmanpuina ah MNF President Zoramthanga chuan kan sawrkar chu hun danga sawrkar pangngai ang a nih loh thu sawiin, “Hripui leng karah dam khawchhuah kan tum a ni ber,” a ti a, “Eptu ten min beiin sawrkar hlawhtling lo anga min chhuah an tum reng a. Mahsela, dam khawchhuah tuma kan beihna kawngah ei leh bar harsa lutuk lova kan awm theite hi Pathian remruat a ni,” tiin “Sum leh pai dinhmunah kum khat leh thla sawm atan kan budget-a kan ziahluh kha, a hlawm lian kan hloh (Central atanga lokal lo) cheng Vbc. 2600 vel leh a tenau nen, a vaiin cheng Vbc. 3000 vel a tling a. Hengte hi hmuh kim ni ta se harsatna awm lovin kan kal thei ang,” a ti a, “Hei hi Pathian remruatna a ni a, ti fat fat tura min zirtirna a ni,” a ti bawk.

Nakum-a inthlanna lo awm turah pawh Pathian leh mipuite zarah sawrkarna an lak leh ngei a rin thu MNF President chuan sawiin, “Tun dinhmunah hmalakna leh hmasawnna tam tak kan nei tawh a. Pathian in tul a tih chuan min pe zel ang. Union Finance Minister-in Union Budget-a Mizoram tan Special Assistance an dah thu min rawn hrilh kha a mak hle. Pathian in a hunah chuan mite thinlungah hna a thawk zel ang,” tiin theihtawp chhuaha hma la zel turin he huna kal-khawmte chu a chah bawk a ni.

Nimin-a MNF Office Bearer's Meeting hi MNF Sr. Vice President Tawnluia chuan kaihruaiin he huna kalkhawm te hian Resolution pali (4) an pass a, Mizoram leh Assam ramri buai meka Mizoram Sawrkar Zoramthanga kaih-hruai sawrkarin huaisen taka a hmachhawn dan chu tha an tih thu leh mipui hnena SEDP sem thei tura hmalakna lawmawm an tih thu te a tel a ni.