Latest News

Town Branch YMA Football inelna ah Vengchung Branch an champion

Serchhip Vengchung Branch YMA chuan Chhekhnai Branch YMA chu 3-1 a hnehin F. Zothanmawia Memorial Football Tournament-ah Champion nomawi an chawi ta.


June 13, 2022 atanga Serchhip Sports Complex-a khelh F. Zothanmawia Memorial Football Tournament hi Inrinni chawhnu khan Final khela zawhfel a ni ta a, Final Match-ah hin Vengchung Branch YMA te hian an phu ang ngeiin 3-1 in hnehna an chang a ni. He inkhel ah hian tan atanga minute 23-na ah Lalchawimawia chuan Vengchung Branch YMA tan goal hmahruai khungin minute 40-na ah Lalpekhlua chuan an goal hnihna khung lehin hun chanve ah si hnih faiin hma an hruai a, Chhekhnai Branch YMA in nidang-a an game khelh an phak lo deuh niin a lang a, a hma ni-a match hautak tak an khelh nghawng ni te pawhin a lang.

Hun chanve hnu lama goal a luh lawk loh hnuah Chhekhnai Branch YMA tan Lalthuthluanga chuan goal rawn khungin an si phurh an sut then a, game boruak pawh danglam chho deuh mah se Lalpekhlua bawkin minute 86-na ah Vengchung Branch YMA tan goal rawn khung lehin hei bak goal dang lut a awm zui lova, 3-1 a hnehna changin Vengchung Branch YMA ten Champion nomawi an chawi ta a ni.

Serchhip Town chhunga YMA Branch 21 zinga Branch 16 te telna F. Zothanmawia Memorial Football Tournament-a Champion Serchhip Vengchung Branch hian Trophy leh Rs. 40,000/- dawngin pahnihna ni ta Chhekhnai Branch YMA hian Trophy leh Rs. 20,000/- an dawng a. Mimal chawimawina sem zingah Best Player atan David Lalawmpuia (Vengchung Branch) chu thlan niin goal 6 khungtu Rodinsanga (Chhim Veng Branch) chu Top Scorer a ni a, Field Veng Branch YMA Goalkeeper C. Lalhriatzuala chu Best Goalkeeper atana thlan niin Lalthuthlunga (Chhekhnai Branch) chu Best Young Player atan thlan a ni bawk a, he Tournament-a tel Branch zawng zawngte pawh YMA te mamawh tur Suahdur hlan vek an ni bawk.

Mipui hlut hlawh Tournament :


He Tournament khelh zawh tak hi Serchhip mipui ten an hlut hle a, Group Match khelh a nih lai atangin inkhel entu thahnem tak awmin Knockout Stage atang phei chuan fans thutna siam hran ngai khawpin entu an tam a, tunhnai kum engemaw zat chhunga Serchhip-a Football Tournament mipui ten an hlut ber pawl niin a lang.

Comments

Popular News (Last 30 Days)