F. Zothanmawia Memorial Football Tournament Quarter Final khelh zawh a ni

Serchhip Sports Complex-a F. Zothanmawia Memorial Football Tournament khelh mekah nimin khan Quarter Final khelh zawh niin naktuk khian Semi Final khelh nghal a ni ang.

Serchhip Hmar Veng Football Club buatsaih Serchhip Town chhunga Branch YMA te Football-a inelna, F. Zothanmawia Memorial Football Tournament-ah hian nimin khan Quarter Final khelh niin inkhel hmasa berah Chhim Veng Branch chuan Field Veng Branch chu Penalty Shoot-out ah hnehin Semi Final an lut a, he inkhel ah hian Field Veng Branch tan minute 16-na ah Dennis Lalhruaitluanga chuan goal a khung a, minute 21-na ah Rodinsanga chuan Chhim Veng Branch tan sut ve lehin goal dang lut a awm lova, 1-1 a an inhnehtawk avang hian Penalty Shoot-out hmanga chak zawk zawnna neiin hetah hian Chhim Veng Branch hi 3-0 in an chak a ni.

Inkhel vawi hnihna ah Serchhip Vengchung Branch chuan Ser-chhip Kawnpui North Branch chu si hnih fai-a hnehin Semi Final an lut ve bawk a, Serchhip Vengchung Branch YMA tan hian minute 32-na ah David Lalawmpuia chuan goal hmahruai khungin minute 46-na ah Lalruatkima chuan an goal hnihna a khung ve leh bawk a ni.

Inkhel vawi thumna ah Chhekhnai Branch YMA chuan Serchhip Kawnpui South Branch chu 6-1 a sawpin Semi Final an lut ve leh bawk a, Chhekhnai Branch YMA tan hian B. Lallawmawma leh Lalthuthlunga te chuan goal hnih ve ve khungin Lalrinzuala leh Lalrindika te chuan goal khat ve ve an khung bawk a, Serchhip Kawnpui South Branch tan hian Stephen Ngurchhuanmawia chuan goal khat a khung ve bawk.

Nimin-a Quarter Final inkhel hnuhnung berah P&E Veng Branch YMA chuan New Serchhip Venglai Branch YMA chu si khat fai-a hnehin Semi Final an lut ve bawk a, he inkhel a goal awmchhun hi minute 41-na a Lalrawngbawla khung a ni.

He Tournement khelh mekah hian naktuk khian Semi Final khelh tura ruahman niin Serchhip Chhim Veng Branch YMA leh Chhekhnai Branch YMA te  an inhmachhawn dawn a, Serchhip Vengchung Branch YMA leh P&E Veng Branch YMA te an inhmachhawn bawk ang.

Town chhunga Branch YMA te Football-a inelna khelh mek hi mipui ten an hlut viau niin a lang a, Group Match khelh a nih atangin a hmunah entu mi thahnem tak awmin nimin lamah pawh a hmuna entu an tam hle a ni.