Latest News

Hnathawh vilpui loh vanga tawrhna a nasa - ZLP

ZPM Legislature Party chuan NHIDCL kawng siam mek sawrkar in a vilpui uluk loh avangin kan ram tui hna, lui tui, nungcha, thing leh mau-in an tuar nasa em em niin an sawi.

Inrinni-a thuchhuah an siamah ZPM Legislature Party chuan Zoram-ah Furpui kan thleng chho tih tarlangin, National Highway Infrastructure Development Corporation Limited (NHIDCL) in Mizoram hmun hrang hranga kawng a siamna hnuhma leh leivung-in mipuite leh environment tan harsatna a thlen nasat thu leh hei hi an ngai thutak hle tih an tarlang a. “NHIDCL kawng siam mek hi kan sawrkarin a vilpui uluk loh avangin kan ram tui hna, lui tui, nungcha, thing leh mau-in an tuar nasa em em a; chenna In chan hial pawh kan awm ta niin a lang. Mizoram mipui pawhin ngaimawhin, tunhnaiah pawl hrang hrangin an duh lohzia an auchhuahpui mek laia, Mizoram sawrkarin ngawih a chuh tlat mai hi hriatthiam a harsa hle,” an ti a ni.

ZPM Legislature Party chuan ram hmasawnna chu a hlut thu leh chutihrualin hmasawnna hnathawhte chuan ram chhunga cheng mihring, nungcha, thing leh mau te tana harsatna a siam em, ram leh hnam himna ti derthawng thei a ni em tih ngaihtuah hmasak fo a tul thu an tarlang a. Kawng laihna leivung paih pawh hi uluk a tul tulh tulh dawn thu leh Environment a tihchhiat theihzia te, mihring leh nungcha, thing leh mau ten an tawrh nasat theihzia te hrereng chunga sawrkarin a enpui a; kan ram-a hmasawnna hnathawhin kan ram leilung a tihchhiat loh dan tur ngaihtuahna nasa zawk sen a tul takzet tawh tih an tarlang a ni.

Kumin May 17 khan ZPM Party chuan thuchhuah siamin kan ram chhunga hmasawnna hnathawh te sawrkarin a enfelpui thuai a tul thu leh kan ram leilung a tihchhiat zel loh nana ngaihtuahna nasa zawk sen a tul takzet tawh thu an lo tarlan tawh thu pawh ZLP thuchhuah chuan tarlangin, “Mi thahnemngai ten Zoram hmun hrang hrangah theihtawp chhuahin Central sawrkar leh Mizoram sawrkar koh eih tumin hma an la mek zel a. Amaherawhchu vawiin thlenga kan sawrkarin hmalakna awmze nei tham a neih hriat a la ni lo cheu hi a pawi kan ti takzet a ni,” an ti.

Mizoram sawrkar chuan July 29, 2020 khan NHAI, NHIDCL, NRRA, BRO, NABARD leh central sawrkar agency dangten Mizorama kawng an laih endik/vilzui turin Roads and Infrastructure Development Board a din thu pawh ZLP thuchhuah chuan tarlangin, “Mizoram-in tuna hun harsa a tawn mekah hian, sum tam tak senga din he Board hian a tihtur dik tak tiin, kawng siam avanga ram mipuite, leilung, thing leh mau leh nungchate bakah feh kawng, Dil leh mi tam tak eizawnna atana harsatna nasa tak a thlen mek lai hian, awmze nei leh chak zawka hmala nghal turin ZPM Legislature party chuan kan phut a ni,” an ti bawk.

Comments

Popular News (Last 30 Days)